فرانسۋز جانە رەسەيلىك اكتريسا، ءانشى ءارى جازۋشى، اقىن ۆلاديمير ۆىسوسكيدىڭ سوڭعى جۇبايى مارينا ۆلادي 89 جاسىندا ومىردەن ءوتتى. ءارتىس تۋرالى فرانسۋزدىق BFV TV تەلەارناسى حابارلادى، دەپ جازادى NUR.KZ «يزۆەستيا»-عا سىلتەمە جاساپ، infohub.kz سايتى حابارلايدى.
«فرانسۋز-ورىس اكتريساسى، ءانشى ءارى جازۋشى مارينا ۆلادي وسى بەيسەنبىدە، 24 قىركۇيەكتە قايتىس بولدى. ول 88 جاستا ەدى»، — دەپ كەلتىرەدى باسىلىم تەلەارنا حابارلاماسىن.
تۋعان كەزدە ەكاتەرينا-مارينا پولياكوۆا-بايداروۆا ەسىمىن العان مارينا ۆلادي 1938 جىلى 10 مامىردا كليشيدە، 1917 جىلعى رەۆوليۋسيادان كەيىن رەسەيدەن كەتكەن ورىس ەميگرانتتارىنىڭ وتباسىندا دۇنيەگە كەلدى. اكەسى، وپەرا ءانشىسى ۆلاديمير پولياكوۆ-بايداروۆ، رەسەيدەن ءبىرىنشى دۇنيەجۇزىلىك سوعىس كەزىندە كەتكەن. اناسى — ورىس گەنەرالىنىڭ قىزى، بالەرينا ميليسا ەنۆالد — 1919 جىلى فرانسياعا ەميگراسيالاعان.
ۆلادي ءوز جولىن پاريج وپەراسىنىڭ جاس ءبيشىسى رەتىندە باستادى، الايدا كوپ ۇزاماي بالەرينا مانسابىنان باس تارتىپ، اكتەرلىك كاسىپتى تاڭدادى. لاقاپ اتىن اكەسى قايتىس بولعاننان كەيىن الدى. العاشقى ءرولىن ون جاسىندا — جان گەرەيدىڭ «جازعى نايزاعاي» (1949) فيلمىندە سومدادى.
ول نەبارى 17 جاسىندا رەجيسسەر روبەر وسسەينگە تۇرمىسقا شىعىپ، ونىڭ ءتورت فيلمىندە ءتۇستى. ولار سول كەزدەگى كينەماتوگرافتاعى ەڭ كورنەكتى جۇپتاردىڭ ءبىرى اتاندى.
1963 جىلى اكتريسا كانن كينوفەستيۆالىندە ۇزدىك ايەل ءرولى ءۇشىن جۇلدە الدى، وندا قازىلار القاسى ونىڭ ماركو فەررەريدىڭ «جۇبايلار توسەگى» فيلمىندەگى جۇمىسىن اتاپ ءوتتى.
1970-1980 جىلدارى مارينا ۆلادي اقىن ءارى بارد ۆلاديمير ۆىسوسكيمەن نەكەدە بولدى. ولار 1967 جىلى تانىسىپ، 1970 جىلى وتباسىن قۇردى. مارينا ءۇشىن ۆىسوسكي ءۇشىنشى كۇيەۋى بولدى، نەكە ءانشىنىڭ 1980 جىلى قايتىس بولۋىنا دەيىن جالعاستى.
ۆىسوسكي قايتىس بولعاننان كەيىن ۆلادي ءتورتىنشى رەت — ونكولوگ دارىگەر لەون شۆارسەنبەرگكە تۇرمىسقا شىقتى. ونىمەن 23 جىل بىرگە ءومىر ءسۇردى، سوڭعى كۇيەۋى 2003 جىلى قايتىس بولدى.
وسسەينمەن ءبىرىنشى نەكەسىنەن ونىڭ ەكى ۇلى — يگور مەن ءپوتر دۇنيەگە كەلدى.