Facebook نەگىزىن قالاۋشى مارك سۋكەربەرگ پەن ونىڭ جۇبايى پريسيللا چان يرلانديانىڭ وڭتۇستىك-شىعىسىنداعى ۋوتەرفورد گرافتىعىندا ورنالاسقان سترانكاللي قامالىنىڭ يەلەرى اتاندى، دەپ حابارلايدى infohub.kz سايتى.
رەزيدەنسيا بلەكۋوتەر وزەنىنىڭ جاعاسىندا، دۋبليندەگى Meta كومپانياسىنىڭ ەۋروپالىق شتاب-پاتەرىنەن شامامەن 200 شاقىرىم جەردە ورنالاسقان. بۇل — اۋدانى شامامەن 1500 شارشى مەتردى قۇرايتىن ءۇش قاباتتى عيمارات، ونى 178 گەكتار اۋماق قورشاپ تۇر، وندا ورمان، باقتار جانە قايىق ايلاعى بار. قامال 1825-1835 جىلدارى سالىنعان.
مامىلە سوماسى جاريالانبايدى، الايدا ساراپشىلاردىڭ باعالاۋىنشا، ول 20-دان 30 ميلليون ەۋروعا دەيىن جەتۋى مۇمكىن. ساتۋشى — لوندوندىق RAB Capital جەكە ينۆەستيسيالىق كومپانياسىنىڭ نەگىزىن قالاۋشىلاردىڭ ءبىرى مايكل الەن-باكلي بولدى.
جۋرناليستەردىڭ ايتۋىنشا، سۋكەربەرگ پەن ونىڭ جۇبايى يرلانديادان ءۇي ىزدەپ جۇرگەن ەدى. سۋكەربەرگتىڭ ءباسپاسوز حاتشىسى برايان بەيكەر مارك پەن ونىڭ وتباسىنىڭ Meta كومپانياسىنىڭ حالىقارالىق شتاب-پاتەرى ورنالاسقان يرلانديادا ۋاقىت وتكىزۋگە جانە وسى تاريحي ۇيگە قامقورلىق جاساۋعا قۋانىشتى ەكەنىن راستادى. دۋبلين مەن كورك قالالارىندا كومپانيادا شامامەن 1500 قىزمەتكەر جۇمىس ىستەيدى، ال كلونيدە دەرەكتەردى وڭدەۋ ورتالىعى ورنالاسقان.
ەسكە سالايىق، بيىلعى جىلدىڭ ناۋرىز ايىندا سۋكەربەرگ مايامي ماڭىنداعى ينديان-كريك-ايلەند جەكە ارالىنداعى «ميللياردەرلەر بۋنكەرى» دەپ اتالاتىن مەگا-ۇيدى 170 ميلليون دوللارعا ساتىپ العان بولاتىن. وسى ساتىپ الۋ اياسىندا يرلانديالىق قامال ءتيىمدى ساتىپ الۋ سياقتى كورىنەدى.