ماسكەۋ ماڭىنداعى ەلەكتروستال قالاسىندا ورنالاسقان Wildberries ماركەتپلەيسىنىڭ لوگيستيكالىق نىسانىندا ۇشقىشسىز ۇشاق شابۋىلى سالدارىنان شىققان ءورت تولىعىمەن ءسوندىرىلدى. بۇل تۋرالى Wildberries & Russ كومپانياسىنىڭ ءباسپاسوز قىزمەتى ءوزىنىڭ Telegram-ارناسىندا حابارلادى، دەپ حابارلايدى infohub.kz سايتى.
ءباسپاسوز رەليزىندە Wildberries كومانداسى بولعان وقيعانىڭ سالدارىن كەشەندى باعالاۋعا جانە زارداپ شەككەن نىساننىڭ ينفراقۇرىلىمىنىڭ جاي-كۇيىن تالداۋعا كىرىسەتىنى ايتىلعان.
كومپانيادا جانعان لوگيستيكالىق كەشەننىڭ قىزمەتكەرلەرى مەن ولاردىڭ تۋىستارىنا ارنالعان جەدەل جەلى تاۋلىك بويى جۇمىس ىستەي بەرەتىنىن اتاپ ءوتتى. سونداي-اق ولار ءورتتى سوندىرۋگە قاتىسقان بارلىق قىزمەتتەرگە شىنايى العىسىن ءبىلدىردى.
ماسكەۋ وبلىسىنداعى Wildberries نىسانىنداعى ءورت 18 شىلدەگە قاراعان ءتۇنى ۋكراينا قارۋلى كۇشتەرىنىڭ ۇشقىشسىز ۇشاقتارىنىڭ شابۋىلى سالدارىنان بولدى. رەسەي تجم دەرەگىنشە، ءورت اۋماعى 25 مىڭ شارشى مەتردى قۇرادى. ەلەكتروستالدا زارداپ شەككەندەر بار، ءبىر ادام قازا تاپتى. ءورتتى سوندىرۋگە بىرنەشە ونداعان تەحنيكا مەن 100-دەن استام قۇتقارۋشى جۇمىلدىرىلدى.