رەسەيدىڭ التى قالاسىنىڭ تۇرعىندارى 25 قىركۇيەكتەن باستاپ قازاقستاننىڭ ديپلوماتيالىق وكىلدىكتەرىنە كەلىپ، كاسپي تەڭىزىندەگى وقۋ-جاتتىعۋ كەزىندە قازا تاپقان اسكەري قىزمەتشىلەردى ەسكە الۋدا. ماسكەۋدەگى قازاقستان رەسپۋبليكاسى ەلشىلىگىنىڭ عيماراتىنا جانە سانكت-پەتەربۋرگ، قازان، ومبى، استراحان، ەكاتەرينبۋرگتەگى باس كونسۋلدىقتارعا گۇل شوقتارى قويىلۋدا. كەلۋشىلەردىڭ اراسىندا رەسەيدە تۇراتىن قازاقستاندىقتار بار، دەپ حابارلايدى infohub.kz سايتى.
ادامدار قازا تاپقانداردىڭ وتباسىلارىنا كوڭىل ايتىپ، زارداپ شەككەندەرگە تەز ساۋىعۋدى تىلەۋدە. ەلشىلىكتىڭ ەلەكتروندىق پوشتاسىنا دا كوڭىل ايتۋ حاتتارى كەلىپ تۇسۋدە.
«قازاقستاننىڭ رەسەيدەگى ديپلوماتيالىق وكىلدىكتەرىندە كوڭىل ايتۋ كىتاپتارى اشىلدى. ولارعا رەسەي قورعانىس ءمينيسترىنىڭ ورىنباسارى ۆاسيلي وسماكوۆ، رەسەي ءسىم تمد ەلدەرى بويىنشا ءۇشىنشى دەپارتامەنتىنىڭ ديرەكتورى الەكساندر ستەرنيك، ەۋرازيالىق ەكونوميكالىق كوميسسيا القاسىنىڭ ءتوراعاسى باقىتجان ساعىنتايەۆ جانە تمد باس حاتشىسىنىڭ ورىنباسارى دەنيس ترەفيلوۆ جازبا قالدىردى. كوڭىل ايتقانداردىڭ قاتارىندا رەسەيدەگى اۆستراليا ەلشىسى دجون گيرينگ، رەسەيدەگى بەلارۋس ەلشىسى يۋري سەليۆەرستوۆ، ومبى ۆيسە-مەرى ەلەنا دياچۋك جانە باسقالار بار»، — دەلىنگەن قازاقستاننىڭ رەسەي فەدەراسياسىنداعى ەلشىلىگىنىڭ ءباسپاسوز قىزمەتىنىڭ حابارلاماسىندا.
ەسكە سالايىق، 24 قىركۇيەكتە ماڭعىستاۋ وبلىسىندا وقۋ-جاۋىنگەرلىك تاپسىرمانى ورىنداۋ بارىسىندا اۋا رايى كۇرت ناشارلاپ، 17 اسكەري قىزمەتشى اشىق تەڭىزگە اعىزىلىپ كەتكەن. ۇشەۋى قۇتقارىلىپ، 14ء-ى قازا تاپتى. 25 قىركۇيەك تاڭىندا سوڭعى جوعالعان ەكەۋىنىڭ — سەرجانت مانسۇر گۋماروۆ پەن ماتروس ميراس تۇردىبەك ۇلىنىڭ دەنەلەرى تابىلدى. وسىدان كەيىن ىزدەۋ وپەراسياسى اياقتالدى.
25 قىركۇيەكتە ەل پرەزيدەنتى قاسىم-جومارت توقاەۆتىڭ وكىمىمەن جالپىۇلتتىق ازا تۇتۋ كۇنى جاريالاندى. مەملەكەت باسشىسىنا الەم ەلدەرىنىڭ باسشىلارى مەن حالىقارالىق ۇيىمدار جەتەكشىلەرىنەن كوڭىل ايتۋ جەدەلحاتتارى كەلىپ ءتۇسۋدى جالعاستىرۋدا.
بۇعان دەيىن «كۋرسيۆ» تەڭىزشىلەردىڭ قازا تابۋىنا قاتىستى ءىس بويىنشا قازاقستان قورعانىس مينيسترلىگىنىڭ بەس وفيسەرى ۇستالعانىن جازعان بولاتىن. نەمقۇرايلىلىق پەن كەمە جۇرگىزۋ ەرەجەلەرىن بۇزۋ باپتارى بويىنشا قوزعالعان قىلمىستىق ءىس باس پروكۋراتۋرانىڭ ەرەكشە باقىلاۋىندا. توتەنشە جاعدايدىڭ سەبەپتەرىن انىقتاۋ ءۇشىن پرەمەر-مينيستر ورىنباسارى قانات بوزىمبايەۆ باسقارعان ۇكىمەتتىك كوميسسيا قۇرىلدى. ۆيسە-پرەمەر كاسپيدەگى وقۋ-جاتتىعۋ كەزىندە قازا تاپقان تەڭىزشىلەردىڭ وتباسىلارى تيەسىلى بارلىق تولەمدەردى كىدىرىسسىز الاتىنىن ۋادە ەتتى.