اقش بيلىگى بوستونعا بەت العان مەديسينالىق ۇشاق جوعالىپ كەتكەن سوڭ التى ادامدى ىزدەستىرىپ جاتىر. امەريكا قۇراما شتاتتارىنىڭ فەدەرالدىق اۆياسيا باسقارماسى بي-بي-سيگە Gulfstream G-100 ۇشاعىمەن بايلانىس ۇزىلگەنىن جانە جەرگىلىكتى ۋاقىت بويىنشا ساعات 1:00-دەن (گرينۆيچ ۋاقىتىمەن 6:00) ءسال كەيىن ىزدەۋ-قۇتقارۋ حابارلاماسىن تاراتقانىن مالىمدەدى. اقش جاعالاۋ كۇزەتىنىڭ سولتۇستىك-شىعىس وكرۋگىنىڭ حابارلاۋىنشا، ماسساچۋسەتس شتاتىنداعى نانتاكەت ارالىنىڭ جاعالاۋىندا اۋە جانە سۋ ىزدەستىرۋ جۇمىستارى جۇرگىزىلۋدە، دەپ حابارلايدى infohub.kz سايتى.
FlightAware ۇشۋ دەرەكتەرىنە سايكەس، ۇشاق بەرمۋد ارالدارىنداعى ل.ف. ۋەيد حالىقارالىق اۋەجايىنان جەرگىلىكتى ۋاقىت بويىنشا ساعات 23:40-تا ۇشىپ، بوستونداعى لوگان حالىقارالىق اۋەجايىنا شىعىس ۋاقىتىمەن 1:30-دا (گرينۆيچ ۋاقىتىمەن 6:30) قونۋى ءتيىس بولاتىن.
جاعالاۋ كۇزەتى جاريالاعان قۇيرىق نومىرىنە قاراعاندا، ۇشاق پاسيەنتتەردى ۇيلەرىنە قايتاراتىن حالىقارالىق مەديسينالىق رەيستەردى ۇسىناتىن Latitude Air Ambulances كومپانياسىنا تيەسىلى بولعان. FlightAware ترەكەرىنىڭ كورسەتۋىنشە، اۋە كەمەسى بايلانىس ۇزىلمەس بۇرىن بيىكتىگىن ايتارلىقتاي تومەندەتىپ، شامامەن 7 300 مەتردەن (24 000 فۋت) 3 300 مەترگە (11 000 فۋت) قۇلديلاعان.