قازاقستان پارلامەنتى سەناتىنىڭ ەكس-توراعاسى ماۋلەن اشىمبايەۆ الداعى جوسپارلارى تۋرالى ايتىپ بەردى، دەپ حابارلايدى Alash.kz.
ساياساتكەر مەملەكەتتىك قىزمەتشى الەۋەتى سۇرانىسقا يە جەردە جۇمىس ىستەۋى كەرەك ەكەنىن اتاپ ءوتتى. «ءبىز مەملەكەتتىك قىزمەتتە ءجۇرىپ، الەۋەتىمىز قاجەت بولاتىن باعىتتا جۇمىس ىستەۋىمىز كەرەك. "مەن انا جاققا بارامىن، مىنا جاققا بارامىن" دەگەن بولمايدى. بۇل دۇرىس ەمەس ۇستانىم. ءبىز مۇنى جاستارعا دا ءتۇسىندىرۋىمىز كەرەك»، — دەدى اشىمبايەۆ.
ول سونداي-اق: «قۇرىلتايعا، حالىق كەڭەسىنە جاڭا ادامدار كەلەدى دەپ سەنەمىن. بارلىق وزگەرىستەر جاقسىلىققا اپارسىن. ءومىر بويى دەپۋتات بولۋ شارتى جوق. جالپى مەملەكەتتىك قىزمەت – ۋاقىتشا دۇنيە. مەملەكەتتىك قىزمەتكە كەلۋ جانە ودان دۇرىس كەتۋ بار. كەيدە كەلۋدەن گورى كەتۋ ماڭىزدىراق»، — دەدى ماۋلەن اشىمبايەۆ سەناتتىڭ سوڭعى وتىرىسىنان كەيىنگى بريفينگتە.
ماۋلەن اشىمبايەۆ مەملەكەت باسشىسى جۇكتەگەن كەز كەلگەن مىندەتتى ورىنداۋعا جانە ەل يگىلىگى ءۇشىن تىنىمسىز ەڭبەك ەتۋگە دايىن ەكەنىن مالىمدەدى. «قانداي لاۋازىمدا بولسام دا، مەملەكەت باسشىسى قويعان ماقساتتارعا جەتۋ جولىنداعى جۇمىستى جالعاستىرامىن. ادىلەتتى قازاقستاندى قۇرۋعا، ەلدەگى رەفورمالىق كۇن ءتارتىبىن جۇزەگە اسىرۋعا ءوز ۇلەسىمدى قوسامىن. قازاقستاننىڭ تۇراقتى جانە تەڭگەرىمدى دامۋىنا، ەلىمىزدىڭ تابىستى، گۇلدەنگەن، كەلەشەگى زور، الەۋمەتتىك-دەموكراتيالىق مەملەكەتكە اينالۋىنا جاردەمدەسۋ ءۇشىن بار كۇشىمدى سالامىن»، — دەپ تۇيىندەدى ول.