قازاقستاندا وقۋشىلاردى تەكسەرۋ ءتاسىلى وزگەرەدى: تەكسەرۋ ناتيجەلەرى مەديسينالىق جۇيەلەرگە اۆتوماتتى تۇردە ەنگىزىلەتىن بولادى، دەپ حابارلايدى infohub.kz سايتى.
مەكتەپ مەديسيناسىنىڭ جاڭا مودەلىن 400-دەن استام مامان تالقىلادى. ول سيفرلىق دياگنوستيكالىق جابدىقتى قولدانا وتىرىپ، پروفيلاكتيكالىق تەكسەرۋلەر جۇرگىزۋدى جانە تەكسەرۋ ناتيجەلەرىن سيفرلىق مەديسينالىق جۇيەلەردە تىركەۋدى كوزدەيدى. جاڭا مودەلدىڭ نەگىزگى ەلەمەنتتەرىنىڭ ءبىرى — وقۋشىلاردىڭ پروفيلاكتيكالىق تەكسەرۋلەرىن سيفرلاندىرۋ ەكەنى اتاپ وتىلەدى.
«تەكسەرۋلەر كەزىندە زاماناۋي سيفرلىق دياگنوستيكالىق قۇرىلعىلار قولدانىلىپ، ناتيجەلەر اقپاراتتىق جۇيەلەردە اۆتوماتتى تۇردە تىركەلەتىن بولادى. بۇل بالانىڭ دەنساۋلىق جاعدايىنىڭ تولىق كورىنىسىن قالىپتاستىرۋعا جانە وزگەرىستەردى ديناميكادا باقىلاۋعا مۇمكىندىك بەرەدى. ەگەر وقۋشىدا بەلگىلى ءبىر ءقاۋىپ فاكتورلارى نەمەسە دەنساۋلىق كورسەتكىشتەرىنىڭ وزگەرىستەرى انىقتالسا، اقپارات ودان ءارى باقىلاۋ، قوسىمشا تەكسەرۋ نەمەسە مەديسينالىق كومەك كورسەتۋ ءۇشىن بمسك ماماندارىنا جەدەل جەتكىزىلە الادى»، — دەلىنگەن ۆەدومستۆو حابارلاماسىندا.
وسىلايشا، مەكتەپ مەديسيناسى ءبىر رەتتىك پروفيلاكتيكالىق تەكسەرۋلەردەن بالا دەنساۋلىعىن جۇيەلى سيفرلىق سۇيەمەلدەۋگە بىرتىندەپ كوشۋدە.
«جاڭا مودەل پروفيلاكتيكالىق قۇرامداس بولىكتى كۇشەيتۋدى كوزدەيدى. ماقسات — دەنساۋلىقتاعى ىقتيمال بۇزىلىستار مەن ءقاۋىپ فاكتورلارىن ەرتە كەزەڭدە انىقتاۋ، ياعني ۋاقتىلى پروفيلاكتيكالىق شارالار ەڭ ۇلكەن ناتيجە بەرە الاتىن كەزدە. بۇل رەتتە مەكتەپ مەديسينا قىزمەتكەرلەرى وسى جۇيەنىڭ ماڭىزدى بولىگىنە اينالادى. ولاردىڭ جۇمىسى تەك مەديسينالىق تەكسەرۋلەر جۇرگىزۋدى عانا ەمەس، سونىمەن قاتار اۋرۋلاردىڭ الدىن الۋدى، سانيتارلىق-اعارتۋ جۇمىسىن، بالالاردا سالاۋاتتى ءومىر سالتى مادەنيەتىن قالىپتاستىرۋدى جانە بمسك ۇيىمدارىمەن ءوزارا ءىس-قيمىلدى قامتيدى»، — دەپ قوستى دەنساۋلىق ساقتاۋ مينيسترلىگىندە.
مامانداردىڭ قاتىسۋىمەن وتكەن كەڭەستەر اياسىندا وقۋشىلاردا سالاۋاتتى ءومىر سالتىنىڭ تۇراقتى داعدىلارىن قالىپتاستىرۋعا جانە پروفيلاكتيكالىق مادەنيەتتى دامىتۋعا باعىتتالعان «سالاماتتى مەكتەپ» جوباسى دا ۇسىنىلدى.
مەكتەپ مەديسيناسىن كادرمەن قامتاماسىز ەتۋگە، سيفرلىق ينفراقۇرىلىمدى دامىتۋعا جانە مەديسينالىق ۇيىمداردىڭ جاڭا تاسىلدەردى ەنگىزۋگە دايىندىعىنا ەرەكشە نازار اۋدارىلدى.
جاڭا مودەل مەكتەپ مەديسيناسىن نەعۇرلىم زاماناۋي، سيفرلىق جانە پروفيلاكتيكالىق ەتۋگە ارنالعان، وسىلايشا بالانىڭ دەنساۋلىق جاعدايىن بەلگىلى ءبىر ساتتە عانا ەمەس، ديناميكادا دا باقىلاۋعا بولادى.