2027 جىلدان باستاپ رەسەيدە شەتەلدىك جۇمىسشىلاردى باقىلاۋدىڭ جاڭا، نەعۇرلىم قاتاڭ ەرەجەلەرى كۇشىنە ەنەدى. بۇل تۋرالى رەسەي فەدەراسياسى قاۋىپسىزدىك كەڭەسى ءتوراعاسىنىڭ ورىنباسارى دميتري مەدۆەديەۆ «ۆەدوموستي» باسىلىمىنا بەرگەن ۇلكەن سۇحباتىندا مالىمدەدى، دەپ حابارلايدى infohub.kz سايتى.
مەدۆەدەۆتىڭ ايتۋىنشا، جەكەلەگەن اۋماقتاردا ميگرانتتاردىڭ شوعىرلانۋى ەل ازاماتتارىن نەگىزدى تۇردە الاڭداتىپ وتىر. «ەڭ الدىمەن، ءىرى اگلومەراسيالارداعى شوعىرلانۋ ازاماتتارىمىزدى ابدەن نەگىزدى الاڭداتادى. بۇل كوبىنە كەلگەندەردىڭ وتباسى مۇشەلەرىنىڭ وسىندا بولۋىمەن، ولاردىڭ ورىس ءتىلىن ناشار بىلۋىمەن، ءبىزدىڭ نورمالار مەن داستۇرلەردى ساقتاعىسى كەلمەۋىمەن، سونداي-اق شەتەلدىكتەردىڭ قۇقىققا قايشى ارەكەتتەرىمەن بايلانىستى. مۇنداي قىلمىستاردىڭ كەيبىرى وتە ۇلكەن رەزونانس تۋدىرادى»، — دەدى ول.
2027 جىلدىڭ قاڭتارىنان باستاپ زاڭنىڭ شەتەلدىك جۇمىسشىلار ءوزىن جانە وتباسىن وڭىرلىك كوەففيسيەنتكە كوبەيتىلگەن ەڭ تومەنگى كۇنكورىس دەڭگەيىنەن كەم ەمەس دەڭگەيدە ۇستاۋعا مىندەتتەيتىن ەرەجەلەرى كۇشىنە ەنەدى. ەگەر سالىق ورگاندارى ميگرانتتىڭ تابىسى بار ەكەنىن راستاماسا نەمەسە ونىڭ تالاپ ەتىلەتىن مولشەرگە سايكەس كەلمەيتىنىن انىقتاسا، پاتەنت نەمەسە جۇمىسقا رۇقسات جارامسىز دەپ تانىلادى، ال شەتەلدىكتىڭ ءوزى مەن ونىڭ وتباسى مۇشەلەرى رەسەيدە بولۋ قۇقىعىنان ايىرىلادى.
سونىمەن قاتار، قاۋىپسىزدىك كەڭەسى ءتوراعاسىنىڭ ورىنباسارى اتاپ وتكەندەي، كوشى-قون سالاسىنداعى باقىلاۋ، ونىڭ ىشىندە بيومەتريالىق دەرەكتەر مەن گەنوم بويىنشا كۇشەيتىلەدى. شەتەلدىكتەر ەندى 30 كۇن ىشىندە تەك ءقاۋىپتى جۇقپالى اۋرۋلارعا عانا ەمەس، ەسىرتكى زاتتارىن قولدانعانىنا دا مەديسينالىق كۋالاندىرۋدان وتۋگە مىندەتتى.
مەدۆەديەۆ سونداي-اق ازاماتتىق تۋرالى زاڭعا قابىلدانعان وزگەرىستەردى ەسكە سالدى. بۇل وزگەرىستەر الىنعان ازاماتتىقتى توقتاتۋ نەگىزدەرىنىڭ ءتىزىمىن ايتارلىقتاي كەڭەيتەدى. «مۇنداعى ۇستانىم ايقىن: جۇمىس ىستەۋگە كەلدىڭ — ءبىزدىڭ ادەت-عۇرىپتى قۇرمەتتە جانە رەسەيلىك زاڭنامانى ساقتا. دايىن بولماساڭ — ەلدەن كەت!» — دەپ قورىتىندىلادى ول.