2019 جىلدىڭ 1 قاراشاسىنان باستاپ قازاقستاندا قاعاز تۇرىندەگى مەكەنجاي انىقتامالارى جويىلدى. ەندى تۇرعىلىقتى جەرى بويىنشا تىركەۋ تۋرالى مالىمەتتەردى eGov.kz پورتالى نەمەسە eGov Mobile ءموبيلدى قوسىمشاسى ارقىلى الۋعا بولادى. بۇل تۋرالى «ۇلتتىق اقپاراتتىق تەحنولوگيالار» اق ءباسپاسوز قىزمەتى ەسكە سالدى، دەپ حابارلايدى infohub.kz NewTimes.kz-كە سىلتەمە جاساپ. قىزمەت مەملەكەتتىك ورگاندارعا بارۋ قاجەتتىلىگىن بولدىرمايدى. ەگەر اقپاراتتى ءۇشىنشى تۇلعا سۇراسا، دەرەكتەرى سۇرالىپ وتىرعان ازاماتتىڭ كەلىسىمىن راستاۋ تالاپ ەتىلەدى.
قىزمەتتى الۋ ءۇشىن eGov.kz پورتالىنا كىرىپ، «ءۇشىنشى تۇلعالاردىڭ تۇرعىلىقتى جەرى بويىنشا مەكەنجاي مالىمەتتەرىن الۋ سەرۆيسىن» تاڭداپ، ازاماتتىڭ ءجسن-ىن كورسەتىپ، قولجەتىمدى ەلەكتروندى قولتاڭبا تاسىلدەرىنىڭ بىرىمەن سۇرانىسقا قول قويۋ قاجەت. كەلىسىم راستالعاننان كەيىن سۇرالعان مالىمەتتەر جەكە كابينەتتە پايدا بولادى.
ەسكە سالامىز، جالدامالى پاتەردە نەمەسە ۇيدە 10 كۇننەن ارتىق تۇراتىن ازاماتتار ۋاقىتشا تىركەلۋگە مىندەتتى. «تۇرعىن ءۇي قاتىناستارى تۋرالى» زاڭعا سايكەس، تۇرعىنداردى تىركەۋ مىندەتى جالعا بەرۋشىگە — مەنشىك يەسىنە دە، ونىڭ وكىلىنە نەمەسە ءۇيدى قوسالقى جالعا بەرۋشىگە جۇكتەلەدى. بۇل نورما 2017 جىلدان بەرى، تەرروريزمگە قارسى تۇزەتۋلەر قابىلدانعاننان كەيىن قولدانىلىپ كەلەدى.
تىركەۋسىز تۇرۋ ءۇشىن ايىپپۇلدار قاراستىرىلعان: جالعا بەرۋشىگە — ءبىرىنشى بۇزۋشىلىق ءۇشىن 10 اەك (43 250 تەڭگە)، ءبىر جىل ىشىندە قايتالانعاندا 20 اەك (86 500 تەڭگە). تىركەۋسىز تۇراتىن جالعا الۋشىعا — ءبىرىنشى بۇزۋشىلىق ءۇشىن 7 اەك (30 275 تەڭگە)، قايتالانعاندا 13 اەك (56 225 تەڭگە).