Мексиканың Тынық мұхит жағалауында «Саймон» дауылы мен «Рэйчел» тропикалық дауылы бес адамның өмірін қиды. Апат салдарынан су тасқыны болып, ағаштар мен электр бағаналары құлады, жолдар жабылып, үйлерді су басты, деп хабарлайды infohub.kz сайты.

Герреро штатының губернаторы Эвелин Сальгадо баспасөз мәслихатында айтқандай, «Саймон» дауылы салдарынан Чильпансинго қаласында қабырға құлап, 71 жастағы ер адам қаза тапқан. Оның сөзінше, дауыл штаттың жағалаудағы қалаларында, соның ішінде ірі теңіз порты Акапулькода инфрақұрылым мен тұрғын үйлерге зақым келтірген.

Ал «Рэйчел» тропикалық дауылы бір отбасының төрт мүшесінің, оның ішінде екі баланың өмірін қиды. Олардың денесі Баха-Калифорния штатындағы Энсенада қаласының шетінде табылған. Бұл туралы штат прокуратурасы хабарлады.

Прокурорлардың мәліметінше, тағы бес адам із-түзсіз жоғалып кеткен, ал қауіпсіздік күштері тікұшақтармен 32 адамды құтқарған. Баха штатының губернаторы Марина дель Пилар уақытша баспаналарда 50-ден астам адамға көмек көрсетіліп жатқанын айтты.

Билік өкілдерінің хабарлауынша, «Саймон» дауылы жағалауға жетпей, бес балдық Саффир-Симпсон шкаласы бойынша екінші санатқа әлсіреген соң, жағалаудан алыстай бастады. Дегенмен жаңбыр туралы ескерту күшінде қалды.

Майамидегі Ұлттық дауыл орталығы алдағы бірнеше күнде Мексиканың батыс-орталық бөлігінде «Саймонмен» байланысты қатты жаңбыр өмірге қауіп төндіретін су тасқыны мен сел әкелуі мүмкін екенін мәлімдеді.

Шенеуніктер кейбір жағалау аудандарында биіктігі бес метрге жететін толқындар күтілетінін ескертті. Мичоакан және Колима штаттарында өзен-бұлақтарға жақын орналасқан елді мекендерді су тасқыны мен көшкін бұрыннан соққыға алған.

Пуэрто-Вальяртада «Саймон, қысқа бол, тыныш бол» деген жазу жазылған тақтаймен қапталған кәсіпорынның жанынан адам өтіп барады.

Тынық мұхиттағы су температурасының көтерілуімен сипатталатын Эль-Ниньо құбылысы осы маусымда аймақтағы дауылдардың қарқынын күшейтіп отыр.

Метеорологтардың айтуынша, жел мен жауын-шашынның жаһандық өзгерісіне және тұрақсыз ауа райына әкелетін 2026-27 жылдардағы Эль-Ниньо тарихтағы ең ірісі болатыны сөзсіз. Ғалымдар қазір адамзат тудырған жаһандық жылыну Эль-Ниньоларды одан әрі қарқынды етіп жатқанын да ойлайды.

Agence France-Presse және Associated Press ақпарат агенттіктерінің деректері пайдаланылды.