مەكسيكانىڭ سينالوا شتاتىنداعى كۋلياكان قالاسىندا مىڭداعان ادام كوشەگە شىعىپ، ەسىرتكى كارتەلدەرى اراسىنداعى قاقتىعىستى توقتاتۋدى تالاپ ەتتى. شەرۋ قاقتىعىس باستالعانىنا ەكى جىل تولۋىنا ورايلاستىرىلىپ ۇيىمداستىرىلدى، دەپ حابارلايدى infohub.kz سايتى.
اقش-تا ىزدەۋدە جۇرگەن ەسىرتكى باروندارىنىڭ ءبىرى يسماەل «ەل مايو» سامبادا ۇستالعاننان كەيىن الاۋىزدىق تۇتانعان ەدى. ونىڭ جاقتاستارى — «لا ماييسا» — ونى سينالوا كارتەلىنىڭ اتىشۋلى نەگىزىن قالاۋشى حواكين «ەل چاپو» گۋسماننىڭ ۇلى ساتىپ كەتتى دەپ ايىپتاپ، ونىڭ توبىنىڭ مۇشەلەرىنە — «لوس چاپيتوسقا» — قارسى شىقتى.
ەكى توپ جۇك كولىكتەرىن باسىپ الىپ، ورتەپ، جولدى بوگەپ، تۇتقيىلدان شابۋىل جاساپ، كولىكتەن اتىپ كەتۋدى ءجيى ۇيىمداستىرادى. كۋلياكان تۇرعىندارى وسى ءوزارا قىرقىس سوعىستىڭ ورتاسىندا قالدى.
رەسمي دەرەكتەرگە قاراعاندا، شتاتتا كىسى ءولتىرۋ مەن جوعالۋ وقيعالارىنىڭ سانى عانا ەمەس، بوپسالاۋ مەن توناۋ دا كۇرت ءوستى.
جەكسەنبىدەگى نارازىلىقتى قۇربانداردىڭ تۋىستارى، جەرگىلىكتى كاسىپكەرلەر، ازاماتتىق قوعام ۇيىمدارى مەن كاتوليك شىركەۋى ۇيىمداستىردى.
كاسىپكەر سەرحيو ەسكەر فرانس-پرەسس اقپارات اگەنتتىگىنە قاقتىعىس باستالعاننان بەرى 5 مىڭنان استام كاسىپورىن جابىلعانىن ايتتى. «سينالوا باستان كەشىپ وتىرعان قاسىرەت — وسى»، — دەدى ورتالىق-سولشىل وپپوزيسيالىق «ازاماتتىق قوزعالىس» پارتياسىنىڭ جەتەكشىسى ەسكەر.
ءىس-شارا كۋلياكان ەپيسكوپى سوعىسىپ جاتقان توپتاردىڭ مۇشەلەرىن زورلىق-زومبىلىقتى توقتاتۋعا شاقىرعان مەسسادان باستالدى.
«توقتاڭدار، نە بولىپ جاتقانىنا قاراڭدار، زارداپ شەككەن وتباسىلارعا، جاستارعا جانە قالامىزعا كوز سالىڭدار. قانداي دا بيلىك، اقشا، اۋماق نەمەسە امبيسيا ادام ومىرىنەن قىمبات ەمەس»، — دەدى ول.
نارازىلىققا وتكەن اپتادا قالاداعى اتىس كەزىندە باسىنا وق ءتيىپ قازا تاپقان ءبىر جاسار بالانىڭ تۋىستارى دا قاتىستى.
زورلىق-زومبىلىق تولقىنىنان بولەك، سينالوا شتاتى سوڭعى ايلاردا ساياسي قالجىراۋدى دا باستان كەشتى.
ساۋىردە اقش پروكۋرورلارى شتات اكىمى رۋبەن روچا مەن تاعى توعىز قازىرگى جانە بۇرىنعى شەنەۋنىكتى «لوس چاپيتوسپەن» ءسوز بايلاسىپ، اقش-قا ەسىرتكى جەتكىزدى دەپ ايىپتادى.
كىناسىن مويىنداماعان روچا مەكسيكا پروكۋرورلارى وزدەرى تەرگەۋ باستاعانشا ۋاقىتشا قىزمەتىنەن كەتتى. ءۇش اپتا بۇرىن ول قىزمەتىنە قايتا ورالدى، ءبىراق بىرنەشە كۇننەن كەيىن پرەزيدەنت كلاۋديا شەينباۋم الەۋمەتتىك جەلىدە ونى تىكەلەي اتاماي-اق «قاعيداتسىز بيلىك مەنمەندىككە اينالادى» دەپ جازعان سوڭ، تاعى دا دەمالىس سۇرادى.