قازاقستاندا بالالاردى مەكتەپكە دايىنداۋعا 23 ملرد تەڭگە ءبولىندى. الەۋمەتتىك وسال وتباسىلارداعى شامامەن 450 مىڭ وقۋشى قارجىلاي قولداۋ الادى. بۇل تۋرالى infohub.kz سايتى حابارلايدى.
ق ر وقۋ-اعارتۋ مينيسترلىگىنىڭ مالىمەتىنشە، تولەمدەر 2026 جىلعى 1 تامىزدان 30 قىركۇيەككە دەيىن «ۆسەوبۋچ» قورى ارقىلى جۇرگىزىلەدى. جاڭا وقۋ جىلىنداعى مەملەكەتتىك قولداۋدىڭ ەڭ تومەنگى مولشەرى 50 851 تەڭگەنى قۇرايدى، بۇل وتكەن جىلمەن سالىستىرعاندا 10 پايىزعا ارتىق. كەيبىر وڭىرلەردە بۇل سوما جوعارى بولۋى مۇمكىن — جەرگىلىكتى بيۋدجەتتىڭ مۇمكىندىگىنە بايلانىستى.
الىنعان قاراجاتتى مەكتەپ فورماسىن، اياق كيىم مەن وقۋ قۇرالدارىن ساتىپ الۋعا جۇمساۋعا بولادى. تولەم الۋعا جەتىم بالالار، اتا-اناسىنىڭ قامقورلىعىنسىز قالعان بالالار، از قامتىلعان وتباسىلاردىڭ وقۋشىلارى، اتاۋلى الەۋمەتتىك كومەك الاتىن وتباسىلاردىڭ بالالارى، سونداي-اق قيىن ومىرلىك جاعدايعا تاپ بولعان كامەلەتكە تولماعاندار ءوتىنىش بەرە الادى.
تولەمدى راسىمدەۋ ءۇشىن اتا-انالار نەمەسە زاڭدى وكىلدەر ءتيىستى قۇجاتتارمەن ءبىلىم بەرۋ ۇيىمىنا جۇگىنۋى قاجەت. بۇعان دەيىن ماتەريالدىق كومەك الۋشىلار بالاعا قاجەتتى زاتتاردى ساتىپ العانىن راستايتىن قۇجاتتاردى ۇسىنۋى ءتيىس ەكەنى حابارلانعان.