جاڭا وقۋ جىلى قارساڭىندا قازاقستان ىشكى ىستەر مينيسترلىگى بالالاردىڭ قاۋىپسىزدىگىن قامتاماسىز ەتۋ ءۇشىن كەشەندى شارالار قابىلدادى. 7 مىڭنان استام مەكتەپ جەدەل باسقارۋ ورتالىقتارى مەن پوليسيانىڭ كەزەكشى بولىمدەرىنە قوسىلعان، بۇل كەز كەلگەن قاۋىپ-قاتەرگە جەدەل دەن قويۋعا مۇمكىندىك بەرەدى، دەپ حابارلايدى infohub.kz سايتى.
قازىرگى ۋاقىتتا رەسپۋبليكادا 7656 جالپى ءبىلىم بەرەتىن مەكتەپ جۇمىس ىستەيدى، ولار 283 مىڭنان استام بەينەباقىلاۋ كامەراسىمەن جابدىقتالعان. ونىڭ 7159-ى ىشكى ىستەر ورگاندارىنىڭ جەدەل دەن قويۋ جۇيەسىنە ينتەگراسيالانعان. ۆەدومستۆو بەينەباقىلاۋ — بۇل كەشەندى قاۋىپسىزدىك جۇيەسىنىڭ ءبىر عانا ەلەمەنتى ەكەنىن، وعان بالالاردىڭ مەكتەپكە بارار جولداعى قاۋىپسىزدىگىن قامتاماسىز ەتۋ شارالارى دا كىرەتىنىن اتاپ ءوتتى.
جاڭا وقۋ جىلىنا دايىندىق اياسىندا ءىىم قىزمەتكەرلەرى ءبىلىم بەرۋ مەكەمەلەرىنىڭ ماڭىنداعى جول ينفراقۇرىلىمىنا 9417 تەكسەرۋ جۇرگىزدى. تەكسەرۋ قورىتىندىسى بويىنشا انىقتالعان كەمشىلىكتەردى جويۋ تۋرالى 4070 نۇسقاما بەرىلدى، ونىڭ 3440-ى قازىرگى ۋاقىتتا ورىندالعان. مەملەكەتتىك ورگانداردىڭ زاڭدى تالاپتارىن ورىنداماعانى ءۇشىن اكىمشىلىك قۇقىق بۇزۋشىلىق كودەكسىنىڭ 462-بابى بويىنشا 11 حاتتاما جاسالدى.
سونىمەن قاتار، مەكتەپتەردىڭ جانىندا 258 جاياۋ جۇرگىنشىلەر وتكەلى، 1429 جاساندى جول كەدەرگىسى، 4854 جول بەلگىسى، 10 شاقىرىمنان استام قورشاۋلار جانە 1897 جارىقتاندىرۋ نىسانى ورناتىلىپ، جابدىقتالدى. مينيسترلىك بۇل شارالاردىڭ بارلىعى ءبىر ماقساتقا — بالالاردىڭ مەكتەپكە بارۋ جانە قايتۋ جولىنداعى قاۋىپسىزدىگىن قامتاماسىز ەتۋگە باعىتتالعانىن اتاپ ءوتتى.
پوليسيا بىرلەسكەن كۇش-جىگەردىڭ ماڭىزدىلىعىن اتاپ كورسەتەدى: «بالالاردىڭ قاۋىپسىزدىگىن قامتاماسىز ەتۋ تەك پوليسيانىڭ كۇشىمەن مۇمكىن ەمەس. مۇندا اتا-انالاردىڭ، پەداگوگتاردىڭ، مەملەكەتتىك ورگانداردىڭ جانە بۇكىل قوعامنىڭ بىرلەسكەن جۇمىسى ماڭىزدى. بۇگىن بۇل جۇمىس ورتاق مەملەكەتتىك مىندەتكە بىرىكتىرىلگەن — بالا تىنىش وقيتىن، داميتىن جانە ءوز بولاشاعىن قۇرا الاتىن جاعداي جاساۋ. بالالارعا قاتىستى «زاڭ جانە ءتارتىپ» قاعيداتى ەڭ الدىمەن مىنانى بىلدىرەدى: ءاربىر بالا ءوز قۇقىقتارى قورعالاتىن، داۋىسى ەستىلەتىن، ال مەكتەپ، كوشە، وتباسى جانە سيفرلىق كەڭىستىك بارىنشا ءقاۋىپسىز بولاتىن ورتادا ءوسۋى كەرەك».