يتاليا پرەمەر-مينيسترى دجوردجا مەلوني قازاقستان پرەزيدەنتى قاسىم-جومارت توقاەۆقا ۇكىمەتىنىڭ تاريحي جەتىستىگىمەن قۇتتىقتاعانى ءۇشىن العىس ءبىلدىردى، دەپ حابارلايدى infohub.kz سايتى.
مەلوني ءوزىنىڭ X الەۋمەتتىك جەلىسىندەگى پاراقشاسىندا توقاەۆتىڭ ەكىجاقتى قارىم-قاتىناستاردى دامىتۋعا قوسقان ۇلەسىن اتاپ ءوتتى. «العىس سوزدەرىڭىز جانە كەزدەسۋلەرىمىزدى ءاردايىم ەرەكشەلەندىرەتىن شىنايى دوستىعىڭىز ءۇشىن راحمەت، پرەزيدەنت توقاەۆ»، — دەپ جازدى يتاليالىق پرەمەر.
مەلوني بولاشاققا كوزقاراسى بار كوشباسشىمەن جۇمىس ىستەۋ ءوزى ءۇشىن ماڭىزدى ەكەنىن اتاپ ءوتتى. «ءبىز بىرگە يتاليا مەن قازاقستان اراسىنداعى قارىم-قاتىناستاردى نىعايتىپ، ەنەرگەتيكادان باستاپ ماڭىزدى مينەرالدارعا دەيىن، ءتىپتى ۋنيۆەرسيتەتتىك ىنتىماقتاستىققا دەيىن جاڭا ستراتەگيالىق مۇمكىندىكتەر اشامىز»، — دەدى ول.
يتاليا پرەمەر-مينيسترى ريم مەن استانا ەكى ەلدىڭ ءوسۋى مەن گۇلدەنۋى ءۇشىن ىنتىماقتاستىقتى جالعاستىرۋعا نيەتتى ەكەنىن قوستى.
بۇعان دەيىن توقايەۆ مەلونيدى ونىڭ ۇكىمەتى يتاليا رەسپۋبليكاسى تاريحىنداعى ەڭ ۇزاق مەرزىمدى ۇكىمەت بولعانىمەن قۇتتىقتاعان بولاتىن. 4 قىركۇيەكتە مەلوني باستاعان مينيسترلەر كابينەتى 1413 كۇن ۇزدىكسىز جۇمىس ىستەپ، سيلۆيو بەرلۋسكونيدىڭ ەكىنشى ۇكىمەتىنىڭ كورسەتكىشىنەن اسىپ ءتۇستى.