جاساندى ينتەللەكت جانە سيفرلىق دامۋ ءمينيسترى جاسلان مادييەۆ ۇكىمەت وتىرىسىندا قازاقستاندىقتاردىڭ ونلاين قىزمەتتەرگە قول جەتكىزۋىن قامتاماسىز ەتۋ شارالارى تۋرالى ايتتى، دەپ حابارلايدى infohub.kz سايتى.
ۆەدومستۆو باسشىسى ەلەكتروندى فورماتتا ۇسىنىلاتىن مەملەكەتتىك قىزمەتتەر ءتىزىمىن كەڭەيتۋ عانا ەمەس، ولاردى الۋ مۇمكىندىگىن كەپىلدەندىرۋ ماڭىزدى ەكەنىن اتاپ ءوتتى. بيىلعى جىلدىڭ ماۋسىم ايىنان باستاپ زاڭنامالىق دەڭگەيدە eGov جانە Aitu سياقتى الەۋمەتتىك ماڭىزى بار سيفرلىق سەرۆيستەرگە ءتاريفسىز قول جەتكىزۋ بەكىتىلدى. بۇل دەگەنىمىز، تەلەفون بالانسى ءنول بولسا دا، ازامات نەگىزگى مەملەكەتتىك جانە الەۋمەتتىك سەرۆيستەردى پايدالانا الادى.
سونىمەن قاتار، ءساۋىر ايىنان باستاپ eGov GPT ينتەللەكتۋالدى سيفرلىق اسسيستەنتى ىسكە قوسىلدى. بۇل سەرۆيس قىزمەت الۋ پروسەسىن جەڭىلدەتەدى: بۇرىن ازامات قاي ۆەدومستۆوعا جۇگىنۋ كەرەكتىگىن، قانداي نىسانداردى تولتىرۋدى جانە قانداي انىقتامالار جيناۋدى ءوزى انىقتاۋعا ءماجبۇر بولاتىن. ەندى ومىرلىك جاعدايدى قىسقاشا سيپاتتاۋ جەتكىلىكتى، مىسالى، «ماعان تىركەلۋ كەرەك» نەمەسە «بيىل بالام مەكتەپكە بارادى». eGov GPT قاجەتتى قىزمەتتى ءوزى انىقتايدى، ءوتىنىش دايىندايدى جانە ءىستى ناتيجەگە دەيىن جەتكىزەدى. ءقازىردىڭ وزىندە eGov GPT ارقىلى ەڭ سۇرانىسقا يە 50 قىزمەت قولجەتىمدى، بۇل ازاماتتار وتىنىشتەرىنىڭ شامامەن 30% قۇرايدى. جىل سوڭىنا دەيىن بۇل كورسەتكىشتى 70% دەيىن ارتتىرۋ جوسپارلانۋدا.