قازاقستان قارجى مينيسترلىگى ەرەكشە تارتىپپەن مەملەكەتتىك ساتىپ الۋ ەرەجەلەرىنە وزگەرىستەر ەنگىزۋ جوباسىن ازىرلەدى. وندا شەكتىك ماندەردەن اسقان جاعدايدا جەكەلەگەن ساتىپ الۋلاردى ءبىرىڭعاي ۇيىمداستىرۋشىلارعا بەرۋ كوزدەلگەن، دەپ حابارلايدى infohub.kz.
قۇجات «اشىق نقا» پورتالىندا جاريالاندى. قارجى مينيسترلىگى «قازاقستان رەسپۋبليكاسى قارجى ءمينيسترىنىڭ 2024 جىلعى 7 قازانداعى № 671 „ەرەكشە تارتىپپەن مەملەكەتتىك ساتىپ الۋدى جۇزەگە اسىرۋ قاعيدالارىن بەكىتۋ تۋرالى“ بۇيرىعىنا وزگەرىستەر مەن تولىقتىرۋ ەنگىزۋ تۋرالى» بۇيرىق جوباسىن تالقىلاۋعا ۇسىندى. قۇجات ەرەكشە تارتىپپەن جۇزەگە اسىرىلاتىن مەملەكەتتىك ساتىپ الۋ جۇيەسىن جەتىلدىرۋ اياسىندا ازىرلەنگەن.
نەگىزگى وزگەرىس — جەكەلەگەن مەملەكەتتىك ساتىپ الۋلاردى وتكىزۋ وكىلەتتىگىن ساتىپ الۋدىڭ ءبىرىڭعاي ۇيىمداستىرۋشىلارى دەڭگەيىنە بەرۋ. بۇل رەتتە جەرگىلىكتى اتقارۋشى ورگانداردىڭ مەملەكەتتىك ساتىپ الۋ باسقارمالارى تۋرالى ايتىلادى. مۇنداي تەتىك ساتىپ الۋ قۇنى قازاقستان رەسپۋبليكاسى قارجى ءمينيسترىنىڭ 2024 جىلعى 28 تامىزداعى № 589 «تاۋارلار، جۇمىستار، كورسەتىلەتىن قىزمەتتەر تىزبەلەرىن بەكىتۋ تۋرالى» بۇيرىعىندا بەلگىلەنگەن شەكتىك ماندەردەن اسقان كەزدە قولدانىلادى.
وسىلايشا، بەلگىلەنگەن ولشەمشارتتارعا سايكەس كەلەتىن ەرەكشە تارتىپتەگى ساتىپ الۋلار مەملەكەتتىك ساتىپ الۋدىڭ ءبىرىڭعاي ۇيىمداستىرۋشىلارى ارقىلى ورتالىقتاندىرىلىپ وتكىزىلەتىن بولادى. جوباعا تۇسىندىرمەدە اتاپ وتىلگەندەي، ۇسىنىلىپ وتىرعان وزگەرىستەر مەملەكەتتىك ساتىپ الۋ تۋرالى زاڭنامانى ودان ءارى جەتىلدىرۋگە، سونداي-اق ساتىپ الۋ راسىمدەرىن ۇيىمداستىرۋ تيىمدىلىگىن ارتتىرۋعا باعىتتالعان.