قازاقستاندا تۇرعىن ءۇي سالىمدارىنا مەملەكەتتىك سىيلىقاقى ەسەپتەۋ ەرەجەلەرىن قاتاڭداتۋ جوسپارلانۋدا. ءتيىستى وزگەرىستەردى «وتباسى بانك» قاراستىرىپ جاتىر، دەپ حابارلايدى infohub.kz سايتى.
ەسكە سالايىق، «وتباسى بانكىندە» تۇرعىن ءۇي سالىمدارىنا اقشا جينايتىن قازاقستاندىقتار جىل سايىن مەملەكەتتىك سىيلىقاقى الادى. ول جىل ىشىندە اۋدارىلعان سوماعا ەسەپتەلەدى، ءبىراق 200 ايلىق ەسەپتىك كورسەتكىشتىڭ 20 پايىزىنان اسپايدى. مىسالى، 2026 جىلى سىيلىقاقىنىڭ ەڭ جوعارى مولشەرى 157 280 تەڭگەنى قۇرادى، ال 2027 جىلى ول 173 000 تەڭگەگە تەڭ بولادى.
الايدا جاقىن ارادا ەرەجەلەر ايتارلىقتاي وزگەرۋى مۇمكىن. «كرىشا» پورتالىنىڭ حابارلاۋىنشا، «وتباسى بانك» تولەم ءتارتىبىن وزگەرتۋ مۇمكىندىگىن قاراستىرۋدا. اتاپ ايتقاندا، تۇرعىن ءۇي دەپوزيتتەرىنە اقشا جيناۋدى توقتاتقان سالىمشىلاردى مەملەكەتتىك سىيلىقاقىدان ايىرۋ ۇسىنىلۋدا. ەگەر سالىمشى سالىمدى جاۋىپ، اقشانى السا، الىنعان بارلىق مەملەكەتتىك سىيلىقاقى بيۋدجەتكە قايتارىلادى. ءقازىر دەپوزيتكە ءۇش جىل تولسا، سىيلىقاقىنى الۋعا بولادى.
سونىمەن قاتار، تولەم مەرزىمىن يپوتەكا رەسىمدەلگەنگە دەيىن شەكتەۋ جوسپارلانۋدا. ءقازىر يپوتەكا رەسىمدەلگەننەن كەيىن دە مەملەكەتتىك سىيلىقاقى ەسەپتەلە بەرەدى، كليەنت تۇرعىن ءۇي قارىزىنا اۋىسقانشا. ياعني، تولەمدەر قارىز الۋشى ارالىق نەمەسە الدىن الا قارىز ساتىسىندا تۇرعان كەزدە جۇزەگە اسىرىلادى. وزگەرىس يپوتەكا رەسىمدەلگەننەن كەيىن بىردەن مەملەكەتتىك سىيلىقاقىنى توقتاتادى.
بانك باسقارماسىنىڭ ءتورايىمى ءلاززات يبراگيموۆا بۇل ۇسىنىستار قاراۋ ساتىسىندا ەكەنىن اتاپ ءوتتى. ەگەر ولار قابىلدانسا، جاڭا ەرەجەلەر تەك جاڭا دەپوزيتتەرگە قولدانىلادى، ال بۇرىن اشىلعان سالىمدار بۇرىنعى تارتىپپەن جۇمىس ىستەي بەرەدى.
سونداي-اق مەملەكەتتىك سىيلىقاقىنى تەك مەملەكەتتىك بيۋدجەتتەن عانا ەمەس، «وتباسى بانكىنىڭ» ديۆيدەندتەرى ەسەبىنەن دە تولەۋ مۇمكىندىگى قاراستىرىلۋدا.
ايتا كەتەيىك، مەملەكەتتىك سىيلىقاقى تولەۋ ەرەجەلەرىن قاتاڭداتۋ بۇرىن دا تالقىلانعان. اتاپ ايتقاندا، باسپانا ساتىپ الۋدان باس تارتقاندار ءۇشىن سىيلىقاقىنى الىپ تاستاۋ تۋرالى ءسوز بولعان.
ەسكە سالايىق، قازاقستاندا تۇرعىن ءۇي قۇرىلىس جيناق جۇيەسى (تقجج) كەڭەيتىلىپ، ەكىنشى دەڭگەيدەگى بانكتەرگە وعان قاتىسۋ مۇمكىندىگى بەرىلدى. الايدا ولاردا «وتباسى بانكىنەن» ايىرماشىلىعى، مەملەكەتتىك سىيلىقاقى قاراستىرىلماعان.