گەرمانيا كانسلەرى فريدريح مەرس «گەرمانياعا بالاما» پارتياسىنىڭ ساكسونيا-انحالت فەدەرالدى جەرىندەگى سايلاۋداعى جەڭىسىنە قاتتى تاڭعالعانىن مالىمدەدى، دەپ حابارلايدى infohub.kz سايتى.
DWء-دىڭ حابارلاۋىنشا، گەرمانيا ۇكىمەتىنىڭ باسشىسى وڭشىل پارتيانىڭ ايماقتىق سايلاۋداعى تابىسىنا پىكىر ءبىلدىردى. ونىڭ ايتۋىنشا، ول دا، ونىڭ ساياسي كۇشى — حريستيان-دەموكراتيالىق وداق (حدو) — داۋىس بەرۋ ناتيجەلەرىنە قاتتى الاڭداۋلى. «بۇل حدو-نىڭ كوپ جىلدار، ءتىپتى ونداعان جىلدار ىشىندەگى سايلاۋداعى ەڭ اۋىر جەڭىلىسى. وتكەن جەرگىلىكتى سايلاۋ تەك ساكسونيا-انحالت ءۇشىن عانا ەمەس، بۇكىل گەرمانيا ءۇشىن وزگەرىستەر اكەلدى»، — دەپ اتاپ ءوتتى ساياساتكەر.
مەرس ءوز پارتياسىنىڭ ساتسىزدىگىنەن ساباق الۋ قاجەتتىگىن ايتتى. «حدو بۇرىنعى كۇن تارتىبىمەن جاي عانا جۇمىسىن جالعاستىرا المايتىنى انىق»، — دەپ قوستى ول.
سونىمەن قاتار، كانسلەر 16 فەدەرالدى جەردىڭ بىرىندە ۋلتراوڭشىلداردىڭ سەنىمدى جەڭىسىنە قاراماستان، گەرمانيا مەملەكەتتىگىنىڭ تۇراقتىلىعىنا سەنىم ءبىلدىردى. ول سونداي-اق كونستيتۋسيانى قورعاۋعا جانە قالىپتاسقان جاعدايدىڭ بارلىق اۋىرلىعىن ەسكەرە وتىرىپ، شارالار قابىلداۋعا نيەتتى ەكەنىن مالىمدەدى.
BILD باسىلىمى مەرستىڭ فرگ تاريحىنداعى تۇڭعىش «وڭشىل راديكال» جەر پرەمەر-مينيسترىنىڭ پايدا بولۋىن جوققا شىعارماعان سوزدەرىن كەلتىرەدى. ساكسونيا-انحالتتىڭ قازىرگى ۇكىمەت باسشىسى، حدو مۇشەسى سۆەن شۋلسە ءوز پارتياسىنىڭ جەڭىلىسىن مويىنداپ، «حدو وپپوزيسياعا وتەدى، ويتكەنى پارتيانىڭ ۇكىمەت قۇرۋعا مانداتى جوق» دەپ اتاپ ءوتتى. وسىلايشا، جاڭا كابينەت قۇرۋ باستاماسى جەڭىمپاز ادگ-عا وتەدى.