ارگەنتينا قۇراماسىنىڭ كاپيتانى ليونەل مەسسي كوماندانىڭ الەم چەمپيوناتى فينالىنا شىعۋى كەزدەيسوقتىق ەمەس ەكەنىن مالىمدەدى. ونىڭ ايتۋىنشا، قاتارىنان ەكى تۋرنيردە شەشۋشى ماچقا جەتەتىن كوماندالار از. بۇل تۋرالى infohub.kz سايتى حابارلايدى.
مەسسي ءقازىر ارگەنتينا قۇراماسى الەمدەگى ەڭ كۇشتى ەكەنىن اتاپ ءوتتى. «ءبىز بۇل تۋرنيردە جەڭىسكە جەتكەننەن كەيىن قايتادان الەم چەمپيوناتىنىڭ فينالىندامىز. سوڭعى ءتورت جىلدا ءبىز ەڭ جاقسى بولدىق – بىرەۋگە ۇناسا دا، ۇناماسا دا، كىم نە دەسە دە. بۇگىن ءبىز قايتادان الەمدەگى ەكى ۇزدىك كوماندانىڭ قاتارىندامىز، جانە بۇل ءبىزدىڭ قول جەتكىزگەنىمىزدىڭ كەزدەيسوق ەمەس ەكەنىن جانە بىزگە ەشكىم ەشتەڭە سىيلاماعانىن كورسەتەدى. قاتارىنان ەكى الەم چەمپيوناتىندا فينالعا شىعۋ – بۇل از ادامداردىڭ قولى جەتەتىن جەتىستىك»، — دەدى ول TyC Sports-قا بەرگەن سۇحباتىندا.
قۇراما كوشباسشىسى سونىمەن قاتار وسى الەم چەمپيوناتىنا قاتىسۋ تۋرالى شەشىمدى بىلتىر قابىلداعانىن جانە تۋرنيرگە وڭتايلى جاعدايدا كەلۋ ءۇشىن قاجىرلى دايىندالعانىن ايتتى. «مەن بۇل تۋرنيردە ويناۋ تۋرالى شەشىمدى بىلتىر قابىلداپ، جاتتىقتىرۋشىمەن ۇنەمى تالقىلادىم. ەڭ جاقسى فورمادا كەلۋ ءۇشىن قولدان كەلگەننىڭ ءبارىن جاسادىم، ءبىر جىل بويى دايىندالىپ، جاتتىقتىم. مەن ەڭ جاقسى جاعدايدا بولۋ جانە ودان ءلاززات الۋ ءۇشىن بار كۇشىمدى سالاتىنىمدى ءبىلدىم»، — دەدى مەسسي.
ەسكە سالا كەتەيىك، ارگەنتينا قۇراماسى انگليانى جەڭىپ، 2026 جىلعى الەم چەمپيوناتىنىڭ فينالىنا قاتارىنان ەكىنشى رەت شىقتى. الدىڭعى الەم چەمپيوناتىندا ارگەنتينالىقتار باس جۇلدەنى يەلەنگەن بولاتىن.
سونداي-اق، ليونەل مەسسي انگليامەن ويىندا الەم چەمپيوناتتارى تاريحىن قايتا جازعانىن اتاپ وتكەن ءجون.