Meta كومپانياسى كىرىكتىرىلگەن كامەراسى جوق اقىلدى كوزىلدىرىكتىڭ جاڭا مودەلىن ۇسىنباقشى. Luna دەگەن كودتىق اتاۋمەن شىعاتىن قۇرىلعى وسى جىلدىڭ كۇزىندە جارىق كورەدى، دەپ حابارلايدى infohub.kz سايتى.
ChannelNews پورتالىنىڭ مالىمەتىنشە، كامەراسىز گادجەت شىعارۋ شەشىمى قوعامنىڭ نارازىلىعى مەن رەتتەۋشىلەردىڭ سىنىنا بايلانىستى قابىلدانعان. بۇعان بۇرىنعى كوزىلدىرىك مودەلدەرىمەن جاسالعان رۇقساتسىز بەينەجازبا وقيعالارى سەبەپ بولعان. جاڭالىق قىركۇيەك ايىنىڭ سوڭىندا Connect كونفەرەنسياسىندا تانىستىرىلىپ، ساتىلىم قازان ايىندا باستالادى دەپ كۇتىلۋدە.
Luna دەگەن كودتىق اتاۋمەن شىعاتىن قۇرىلعىدا نەگىزگى نازار اۋديوفۋنكسيالار مەن جاساندى ينتەللەكتپەن ينتەگراسياعا اۋدارىلعان. كوزىلدىرىك التى ميكروفونمەن، ديناميكتەرمەن جانە Meta AI داۋىستىق كومەكشىسىن جىلدام شاقىرۋعا ارنالعان جەكە تۇيمەمەن جابدىقتالادى. كامەرانىڭ بولماۋى كورپۋستى جۇقا ءارى جەڭىل ەتەدى — سىرتقى ءتۇرى قاراپايىم كوزىلدىرىكتەن اجىراتىلمايدى.
Meta-نىڭ بۇرىنعى اقىلدى كوزىلدىرىك نۇسقالارى بىرنەشە رەت جانجالعا ۇشىراعان: قولدانۋشىلار جازۋ ينديكاتورىن جاسىرىپ نەمەسە بۇزىپ، قوعامدىق ورىنداردا ادامداردى جاسىرىن ءتۇسىرۋدىڭ جولدارىن تاپقان. كامەراسىز نۇسقانى شىعارۋ كومپانياعا قۇپيالىلىققا الاڭدايتىن ساتىپ الۋشىلاردى تارتۋعا جانە مەكەمەلەردەگى جازۋ قۇرىلعىلارىن پايدالانۋعا قويىلعان تىيىمداردى اينالىپ وتۋگە مۇمكىندىك بەرەدى.