قازاقستاندىق ءانشى ديماش قۇدايبەرگەننىڭ اندەرى FIFA 2026 فۋتبولدان الەم چەمپيوناتى كەزىندە مەكسيكانىڭ ساپوپان قالاسىنداعى رەسمي FIFA Fan Fest-تە ورىندالدى، دەپ حابارلايدى infohub.kz سايتى.
FIFA Fan Fest — الەم چەمپيوناتىنىڭ ەڭ ءىرى رەسمي فان-ايماقتارىنىڭ ءبىرى، ونى FIFA حاليسكو شتاتىنىڭ ۇكىمەتىمەن بىرلەسىپ ۇيىمداستىردى. مۇندا ماچتاردىڭ ترانسلياسياسىمەن قاتار، كونسەرتتەر، مادەني باعدارلامالار، گاسترونوميالىق فەستيۆالدار مەن ءتۇرلى ينتەراكتيۆتى ءىس-شارالار وتەدى.
ديماشتىڭ رەسمي جانكۇيەرلەر سايتىنىڭ حابارلاۋىنشا، مۋزىكالىق باعدارلاماعا 13 جاستاعى مەكسيكالىق ءانشى انحەل حەراردو كوۆاررۋبياس كابرەرا (ساحنالىق اتى — Angeloo) قاتىستى. ونىڭ ايتۋىنشا، ديماشتىڭ شىعارماشىلىعىمەن ول 10 جاسىندا تانىسىپ، ونىڭ داۋىسى مەن اندەرى ارقىلى جەتكىزەتىن يدەيالارىنان شابىتتانعان.
2025 جىلى Angeloo يسپان تىلىندەگى SOS ءانىن ورىنداپ، La Voz Zapopan de los Niños y las Niñas بالالار ۆوكالدىق بايقاۋىندا جەڭىسكە جەتتى. وسى جەڭىسىنىڭ ارقاسىندا ول FIFA Fan Fest ساحناسىندا ونەر كورسەتۋگە شاقىرۋ الدى.
ەكى مىڭنان استام كورەرمەن الدىندا جاس ءانشى Diva Dance، Sinful Passion جانە When I’ve Got You كومپوزيسيالارىن ورىندادى. ونىڭ ونەرىن ديماشتىڭ مەكسيكالىق جانكۇيەرلەر كلۋبى Dears Jalisco Mexico مۇشەلەرى قولدادى.
«ديماشتىڭ حابارلاماسىن كوپ ادامعا جەتكىزۋ مەنى قۋانىشقا بولەيدى. ول تۋرالى مۇمكىندىگىنشە كوپ ادام بىلگەنىن قالايمىن جانە ءبىر كۇنى ونىمەن كەزدەسىپ، ءومىرىمدى وزگەرتكەنى ءۇشىن العىس ايتۋدى ارماندايمىن»، — دەدى Angeloo.