باتىس قازاقستان وبلىسىنداعى مي-8 تىكۇشاعىنىڭ اپاتىنا قاتىستى قىلمىستىق ءىس ءۇش جارىم جىلدان كەيىن سوتقا جولداندى. اپات سالدارىنان ءتورت ادام قازا تاپتى، دەپ حابارلايدى infohub.kz.
مي-8 تىكۇشاعىنىڭ قۇلاۋىنا قاتىستى قىلمىستىق ءىس باتىس قازاقستان وبلىسى بايتەرەك اۋدانىنىڭ №2 سوتىندا قارالۋدا. سوت وتىرىستارى قازاقستان قىلمىستىق كودەكسىنىڭ 344-بابى بويىنشا وتۋدە. بۇل باپ تەمىرجول، اۋە، تەڭىز نەمەسە وزەن كولىگىنىڭ قوزعالىس قاۋىپسىزدىگى نەمەسە پايدالانۋ ەرەجەلەرىن بۇزعانى ءۇشىن جاۋاپكەرشىلىكتى كوزدەيدى.
ەسكە سالايىق، 2023 جىلعى 23 اقپاندا «قازاۆياقۇتقارۋ» كومپانياسىنىڭ تىكۇشاعى باتىس قازاقستان وبلىسىندا قاتتى قونۋ جاساعان بولاتىن. ازاماتتىق اۆياسيا كوميتەتىنىڭ مالىمەتىنشە، تىكۇشاق «قازترانسويل» اق تاپسىرىسى بويىنشا قۇبىردى اينالىپ ۇشۋ جۇمىسىن ورىنداعان.
العاشىندا وقيعا سالدارىنان ادام شىعىنى جوق، جاراقات العاندار بار دەپ حابارلانعان ەدى. الايدا كەيىن قاتتى قونۋ كەزىندە ءتورت ادام قازا تاۋىپ، تاعى ەكى ادام جاراقات العانى بەلگىلى بولدى.
قازاقستان رەسپۋبليكاسى توتەنشە جاعدايلار مينيسترلىگىنىڭ دەرەگىنشە، تىكۇشاق بورتىندا التى ادام بولعان: ەكيپاجدىڭ بەس مۇشەسى جانە «قازترانسويل» اق-نىڭ ءبىر وكىلى. ۆەدومستۆو قاتتى قونۋ سالدارىنان ءتجم-نىڭ «قازاۆياقۇتقارۋ» قىزمەتكەرلەرى قازا تاپقانىن قوسىمشا مالىمدەدى. سونداي-اق زارداپ شەككەندەردى قۇتقارۋ كادرلارى جاريالاندى.
قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگىنىڭ كولىكتەگى وقيعالار مەن ينسيدەنتتەردى تەرگەۋ دەپارتامەنتى بولعان وقيعاعا قاتىستى تەرگەۋ جۇرگىزدى.
سونىمەن قاتار، وقيعا فاكتىسى بويىنشا پوليسيا ق ر قك-نىڭ 344-بابى «اۋە كەمەسىنىڭ قوزعالىس قاۋىپسىزدىگى نەمەسە پايدالانۋ ەرەجەلەرىن بۇزۋ، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوقتىرعان» بويىنشا قىلمىستىق ءىس قوزعادى. تەرگەۋ ق ر باس كولىك پروكۋراتۋراسىنىڭ قاداعالاۋىمەن جۇرگىزىلدى.