الەۋمەتتىك تۇرعىدان قولايسىز اۋدانداردا تۇرۋ مي دەنساۋلىعىنىڭ ناشارلاۋىمەن جانە ونىڭ بيولوگيالىق قارتايۋىنىڭ جەدەلدەۋىمەن تىكەلەي بايلانىستى. بۇل تۇجىرىمعا مەديسونداعى ۆيسكونسين ۋنيۆەرسيتەتىنىڭ مەديسينا مەكتەبى مەن قوعامدىق دەنساۋلىق ساقتاۋ مەكتەبىنىڭ عالىمدارى كەلدى، دەپ حابارلايدى infohub.kz سايتى.
18 بەن 96 جاس ارالىعىنداعى 2826 پاسيەنتتىڭ ماگنيتتىك-رەزونانستىق توموگرافيا دەرەكتەرىن قامتىعان رەتروسپەكتيۆتى زەرتتەۋ ناتيجەلەرى سولتۇستىك امەريكا راديولوگيالىق قوعامىنىڭ (RSNA) «Radiology» جۋرنالىندا جاريالاندى. News-Medical باسىلىمى اتاپ وتكەندەي، كەدەي شاعىن اۋدانداردىڭ تۇرعىندارىندا مي كولەمىنىڭ كىشىرەيۋى مەن اق زاتتىڭ زاقىمدانۋى تىركەلگەن.
ءومىر دەڭگەيىن باعالاۋ ءۇشىن ماماندار تابىس، ءبىلىم، جۇمىسپەن قامتىلۋ جانە تۇرعىن ءۇي جاعدايىن قوسا العاندا، 17 كورسەتكىش بويىنشا ەسەپتەلەتىن اۋدانداردىڭ دەپريۆاسيا يندەكسىن (ADI) پايدالاندى.
زەرتتەۋ جەتەكشىسى دوكتور دجون-پول دج. يۋ ەڭ قولايسىز اۋدانداردىڭ تۇرعىندارىندا ميدىڭ بيولوگيالىق جانە حرونولوگيالىق جاسى اراسىنداعى الشاقتىق ۇلعايىپ، جالپى كولەمى كىشىرەيەتىنىن اتاپ ءوتتى.
سونىمەن قاتار مرت-سكانەرلەۋ قولايسىز اۋماقتاردىڭ تۇرعىندارىندا اق زاتتىڭ گيپەرقارقىندىلىعى — سوزىلمالى سترەسس، جوعارى قان قىسىمى جانە ۇيقىسىزدىقتان تامىرلاردىڭ زاقىمدالعانىن بىلدىرەتىن جارىق ايماقتاردىڭ كولەمى جوعارى ەكەنىن انىقتادى. جۇمىس اۆتورلارىنىڭ ايتۋىنشا، مۇنداي وزگەرىستەر تانىمدىق بۇزىلىستاردىڭ، دەمەنسيانىڭ جانە جۇرەك-قان تامىرلارى پاتولوگيالارىنىڭ دامۋ ءقاۋپىن ارتتىرادى.
زەرتتەۋشىلەر كومەك باعدارلامالارىن ازىرلەۋ جانە دەنساۋلىق ساقتاۋ رەسۋرستارىن ءبولۋ كەزىندە الەۋمەتتىك جانە ەكولوگيالىق فاكتورلاردى ەسكەرۋ قاجەتتىگىن اتاپ كورسەتەدى.