ميچيگان شتاتىنىڭ ميسوكي وكرۋگىندە بولعان اتىس وقيعاسى بەس ادامنىڭ ءومىرىن قيدى. قارۋلى شابۋىل جاساپ، ءىزىن سۋىتقان كۇدىكتىنىڭ ءمايىتى كەيىن ورماندى القاپتان ونىڭ قۇرباندارىنىڭ بىرىمەن بىرگە تابىلدى. بۇل تۋرالى infohub.kz سايتى حابارلايدى.
پوليسيانىڭ مالىمەتىنشە، 13 جاستاعى قىز امان قالىپ، ونىڭ جاعدايى تۇراقتى. قازا تاپقانداردىڭ اراسىندا 16 جاستاعى ۇل، 45 جاستاعى ەر ادام، 40 جاستاعى ايەل، 53 جاستاعى ەر ادام جانە 29 جاستاعى ايەل بار. العاشقى شابۋىل دەترويتتان سولتۇستىك-باتىسقا قاراي شامامەن 270 شاقىرىم جەردەگى ۇيدە بولعان. قۇقىق قورعاۋ ورگاندارىنىڭ حابارلاۋىنشا، كۇدىكتى چاد حيكمان (39 جاستا) سول جەردەن قاشىپ، ەكىنشى ۇيدە تاعى ءبىر ادامدى ولتىرگەن، سودان كەيىن ورماندا تاعى ءبىر ايەلدى اتىپ ولتىرگەن.
ميچيگان شتاتىنىڭ پوليسياسى قۇربانداردىڭ تۋىستىق قاتىناسىن نەمەسە كۇدىكتىمەن بايلانىسىن ناقتىلاماعان. بارلىق قازا تاپقاندار وق جاراقاتىنان مەرت بولعان. پوليسيا لەيتەنانتى ەشلي ميللەر بۇل وقيعانى «جۇرەكتى اۋىرتاتىن جاعداي» دەپ سيپاتتاپ، تەرگەۋ جالعاسىپ جاتقانىن جەتكىزدى.
چاد حيكماننىڭ 2024 جىلى بالاعا قاتىستى قۇقىق بۇزۋشىلىق ءۇشىن سوتتالعانى بەلگىلى بولدى. ول ءبىر جىلعا باس بوستاندىعىنان ايىرىلعان. سول ىستە وعان تاعىلعان اۋىر قىلمىس جانە جىنىستىق سيپاتتاعى ايىپتار الىنىپ تاستالعان ەدى.
ميچيگان گۋبەرناتورى گرەتحەن ۋيتمەر بۇل وقيعاعا بايلانىستى كوڭىل ايتىپ، قۇربانداردىڭ وتباسىلارىنا جانە ميسوكي قاۋىمداستىعىنا قولداۋ بىلدىرەتىنىن جازدى. تەرگەۋ ءالى دە جالعاسۋدا.