الەمگە «كاليپسو پاتشاسى» اتانىپ كەتكەن ترينيداد-توباگولىق ءانشى Mighty Sparrow 91 جاستا قايتىس بولدى. ول جەكسەنبى كۇنى نيۋ-يوركتە وتباسىنىڭ ورتاسىندا تىنىش دۇنيە سالدى، دەپ حابارلايدى infohub.kz سايتى.
ساحنادا Mighty Sparrow دەگەن لاقاپ اتپەن تانىلعان سلينگەر فرانسيسكو 1956 جىلى «Jean and Dinah» انىمەن كاليپسو مۋزىكاسىندا تانىمالدىققا جەتكەن ەدى. وتباسىنىڭ مالىمدەمەسىندە ونىڭ قىسقا عانا سىرقاتتان كەيىن ومىردەن وتكەنى ايتىلدى، وزگە ەگجەي-تەگجەي جاريالانبادى.
«ول — شوۋ-بيزنەس سالاسىنداعى تۇتاس ءبىر ينستيتۋت. ءانشى، ءان اۆتورى جانە تالىمگەر رەتىندە شەبەرلىگى مەن ىسكەرلىگىمەن جوعارى باعالاندى، كوپشىلىككە سۇيىكتى بولدى»، — دەلىنگەن فرانسيسكو وتباسىنىڭ مالىمدەمەسىندە.
ترينيداد جانە توباگونىڭ بىرىككەن كاليپسونيستەر ۇيىمى مارقۇمدى «مادەنيەتىمىزدىڭ ايقىن داۋىسى، شەبەر اڭگىمەشى جانە مۋزىكاسى كاليپسونى ترينيداد پەن توباگودان بۇكىل الەمگە تاراتقان الىپ تۇلعا» رەتىندە ەستە قالدىراتىنىن مالىمدەدى.
فرانسيسكو 1935 جىلدىڭ شىلدەسىندە گرەنادانىڭ جاعالاۋىنداعى گراند-روي قالاسىندا دۇنيەگە كەلگەن. 1937 جىلى اتا-اناسىمەن ترينيداد پەن توباگوعا كوشكەندە ول ءالى ءسابي ەدى.
كاليپسو مۋزىكاسىنىڭ وتانى سانالاتىن ترينيداد پەن توباگودا Mighty Sparrow ەسىمى مەن بەينەسى پايدا بولىپ، وسى جانردا «Both of Them»، «Congo Man»، «Mr. Walker»، «The Lizard» سەكىلدى كوپتەگەن حيت اندەر جازدى.
قۇربىلارى ونى «Birdie» دەپ تە ەركەلەتىپ اتايتىن. التى ونجىلدىققا سوزىلعان شىعارماشىلىق جولىندا جۇزدەگەن ءان جازدى. الەمنىڭ بىرنەشە ەلىندە ونەر كورسەتتى، ونىڭ ىشىندە نيۋ-يوركتەگى اتاقتى Madison Square Garden ساحناسىندا دا ونەر كورسەتتى.
ترينيدادتىق مادەنيەتتانۋشى جانە جازۋشى دوكتور رۋدولف ءوتتليدىڭ ايتۋىنشا، فرانسيسكو بۇكىل مانسابىندا كاليپسو ونەرىن دامىتۋدى ماقسات ەتتى.
«Mighty Sparrow — اسقان ويىن-ساۋىق شەبەرى، مادەني رەۆوليۋسيونەر جانە الەمنىڭ ەڭ ۇلى كاليپسونيستەرىنىڭ ءبىرى ەدى»، — دەدى وتتلي Associated Press اگەنتتىگىنە.
ترينيداد پەن توباگو كومپوزيتور ءارى ورىنداۋشىنى ۇلتتىق ماراپاتتارمەن اتاپ ءوتتى. 1987 جىلى باتىس ءۇندىستان ۋنيۆەرسيتەتى فرانسيسكوگە قۇرمەتتى ادەبيەت دوكتورى دارەجەسىن بەردى.