قازاقستاندىق ميلليونەر الماز السەنوۆ پەن ونىڭ جۇبايى انەل السەنوۆاعا تيەسىلى «AA Arena North» كومپانياسى پەتروپاۆلدا ءقوناقۇي كەشەنىن سالۋعا ءوتىنىم بەردى، دەپ حابارلايدى infohub.kz سايتى.
جوبا تۋرالى اقپارات قازاقستاننىڭ دامۋ بانكىنىڭ رەسمي سايتىنداعى «قارالىپ جاتقان جوبالار» بولىمىندە ورنالاستىرىلعان. جاريالانعان دەرەكتەرگە سايكەس، جوبانى سولتۇستىك قازاقستان وبلىسىندا جۇزەگە اسىرۋ جوسپارلانۋدا. قارىز الۋشى «AA Arena North» ج ش س بولىپ تابىلادى، ال ءوتىنىمنىڭ مارتەبەسى «ينديكاتيۆتى تالداۋ كەزەڭىنە قۇجاتتار جيناۋ» دەپ بەلگىلەنگەن. بۇل جوبا الدىن الا قاراۋ ساتىسىندا تۇرعانىن جانە قارجىلاندىرۋ تۋرالى تۇپكىلىكتى شەشىم ءالى قابىلدانباعانىن بىلدىرەدى.
بولاشاق ءقوناقۇي كەشەنىنىڭ ينۆەستيسيا كولەمى، قۇرىلىس مەرزىمدەرى، نىساننىڭ ساناتى مەن بولمەلەر سانى سياقتى مالىمەتتەر جاريالانعان اقپاراتتا كورسەتىلمەگەن.
الماز السەنوۆ قازاقستاننىڭ ەڭ باي كاسىپكەرلەرىنىڭ قاتارىنا كىرەدى. Forbes Kazakhstan مالىمەتىنشە، 2026 جىلى ول ەلدەگى ەڭ باي 75 بيزنەسمەننىڭ رەيتينگىندە 204 ميلليون دوللار بايلىعىمەن 48-ورىندا تۇر.
كاسىپكەردىڭ نەگىزگى اكتيۆى — شۆەيساريادا تىركەلگەن، اۋىل شارۋاشىلىعى ونىمدەرىمەن حالىقارالىق ساۋدا، لوگيستيكا، ساقتاۋ، ەكسپورتقا دەيىنگى قارجىلاندىرۋ جانە ساۋدا نەسيەلەۋ سالاسىندا جۇمىس ىستەيتىن Harvest Group. 2025 جىلدىڭ سوڭىندا كومپانيا قازاقستانداعى اگرارلىق جوباعا ينۆەستيسيانى 1،4 ميلليارد دوللارعا دەيىن ۇلعايتۋدى جاريالادى، وندا تولىق سيكلدى اۋىل شارۋاشىلىعىنىڭ سيفرلىق ەكوجۇيەسىن قۇرۋ جوسپارلانۋدا.
بيزنەستەن بولەك، السەنوۆ سپورتتاعى قىزمەتىمەن تانىمال. ول Jenys كاسىبي دزيۋدو كلۋبىنىڭ قۇرىلتايشىسى جانە حالىقارالىق دزيۋدو فەدەراسياسى پرەزيدەنتىنىڭ كەڭەسشىسى قىزمەتىن اتقارادى. سونداي-اق جاقىندا كاسىپكەر PSG Academy Kazakhstan كومپانياسىنىڭ نەگىزىن قالاۋشىسى بولدى.