ارنايى MIND تاعام رەجيمىن ۇستانۋ مي كولەمىنىڭ كىشىرەيۋى مەن سۇر زاتتىڭ جوعالۋىن تەجەپ، قارتايۋدى شامامەن 2،5 جىلعا كەيىنگە شەگەرەدى. بۇل تۋرالى ScienceDaily جازدى، دەپ حابارلايدى infohub.kz سايتى.
MIND ديەتاسى جەرورتاتەڭىزدىك راسيون مەن قان قىسىمىن تومەندەتۋگە باعىتتالعان تاعامدانۋ ۇستانىمدارىن بىرىكتىرەدى. ول جاسىل شوپتەر، كوكونىستەر، جيدەكتەر، جاڭعاقتار، تۇتاس ءداندى ونىمدەر، بالىق، بۇرشاقتىلار، ءزايتۇن مايى مەن قۇس ەتىن تۇراقتى تۇتىنۋدى قاراستىرادى. سونىمەن قاتار راسيوندا سارى مامىر، ىرىمشىك، قىزىل ەت، تاتتىلەر مەن قۋىرىلعان فاستفۋدتى ازايتۋ ۇسىنىلادى.
اۋقىمدى زەرتتەۋ 12 جىلعا سوزىلىپ، وعان 1647 ادام قاتىستى. عالىمدار ەرىكتىلەرگە ميدىڭ مرت-سىن ۇنەمى جاساپ، ولاردىڭ تاعامدانۋىن تالدادى. وسىنداي ديەتانى ۇستانعان ادامداردا سۇر زات كولەمىنىڭ ازايۋى ايتارلىقتاي باياۋ جۇرگەنى انىقتالدى. ەڭ ايقىن وڭ اسەردى جيدەكتەر مەن قۇس ەتى كورسەتتى. تاتتىلەر مەن قۋىرىلعان تاعامدار، كەرىسىنشە، مي تىندەرىنىڭ تەزىرەك جوعالۋىمەن بايلانىستى بولدى.
ديەتانىڭ پايدالى اسەرى ەگدە جاستاعى ادامداردا، سونداي-اق بەلسەندى ءومىر سالتىن ۇستاناتىن جانە ارتىق سالماعى جوق ادامداردا كۇشتىرەك بايقالدى. جۇمىس اۆتورلارى باقىلاۋ تىكەلەي سەبەپ-سالدار بايلانىسىن دالەلدەمەگەنىن، الايدا ناتيجەلەر نەرۆ جۇيەسىن قورعاۋ ءۇشىن دۇرىس راسيوننىڭ ماڭىزدىلىعىن راستايتىنىن اتاپ ءوتتى.