«سارىاعاش» مينەرالدى سۋىنىڭ ءوندىرۋشىسى 2025 جىلى 2،2 ملرد تەڭگە تازا پايدا تاپتى، بۇل وتكەن جىلمەن سالىستىرعاندا 28%-عا ارتىق. قازاقستاننىڭ بەلگىلى كاسىپكەرى قايرات بورانباەۆقا تيەسىلى «الەكس» كومپانياسى قارجىلىق كورسەتكىشتەرىن ارتتىرۋدى جالعاستىرۋدا، دەپ حابارلايدى infohub.kz سايتى.
كاسىپورىننىڭ ءونىم ساتۋدان تۇسكەن تابىسى 24%-عا ءوسىپ، 11،7 ملرد تەڭگەنى قۇرادى. بۇل رەتتە شىعارىلعان سۋدىڭ وزىندىك قۇنى دا ءوستى — 20،3%-عا، 7،6 ملرد تەڭگەنى قۇرادى. اكىمشىلىك شىعىندار 89%-عا ءوسىپ، 1،5 ملرد تەڭگەگە جەتتى، بۇل ەڭبەك اقى تولەۋ شىعىندارىنىڭ ەكى ەسە دەرلىك وسۋىنە (612،4 ملن تەڭگەگە دەيىن)، سونداي-اق جارناما مەن ديزاينعا (157 ملن تەڭگە) جانە جوندەۋ مەن تەحنيكالىق قىزمەت كورسەتۋگە (136،6 ملن تەڭگە) جۇمسالعان ەلەۋلى شىعىندارعا بايلانىستى. وتكەن جىلى سوڭعى ەكى باپ بويىنشا شىعىندار مينيمالدى بولعان.
كومپانيا بالانسىندا 582 ملن تەڭگە سوماسىندا اياقتالماعان قۇرىلىس تۇر. 2020 جىلى كاسىپورىن جاڭا ۇڭعىمانى يگەرۋ جانە بۇرعىلاۋ جۇمىستارىن باستادى، الايدا 2025 جىلى ولاردى توقتاتۋ تۋرالى شەشىم قابىلداندى. بۇدان شىعىن 134،7 ملن تەڭگەنى قۇرادى.
سونىمەن قاتار، كومپانيا قولدانىستاعى كاسىپورىندى رەكونسترۋكسيالاۋ مەن كەڭەيتۋدى قامتيتىن مينەرالدى سۋ وندىرەتىن جاڭا زاۋىتتى دايىنداۋ جانە سالۋ جۇمىستارىن جۇرگىزۋدە. وسى جوبا بويىنشا جۇمىستار جالعاسۋدا.
2025 جىلعى 29 ساۋىردە كومپانيا زاۋىت قۇرىلىسىن قارجىلاندىرۋ ءۇشىن جەتى جىل مەرزىمگە 1 ملرد تەڭگە كولەمىندە كرەديتتىك جەلى اشۋ تۋرالى كەلىسىمگە قول قويدى. وسى كەلىسىم اياسىندا 2025 جىلى 511،4 ملن تەڭگە كولەمىندە نەسيە الىندى.
كاسىپورىن وڭتۇستىك قازاقستان وبلىسىنىڭ سارىاعاش اۋدانىندا ءۇش ۇڭعىمانى پايدالانا وتىرىپ، مينەرالدى سۋدى وندىرۋمەن جانە بوتەلكەگە قۇيۋمەن اينالىسادى. ءونىم Alex Saryagash برەندىمەن ساتىلادى.
كومپانيانىڭ جالعىز يەسى — قازاقستاننىڭ ەڭ ىقپالدى كاسىپكەرلەرىنىڭ ءبىرى قايرات بورانبايەۆ. وعان قوسا، وعان I’m فاستفۋد مەيرامحانالار جەلىسى جانە Food Packaging قاپتاما ءوندىرۋشىسى تيەسىلى، سونداي-اق ول Esentai Mall جانە Esentai Tower ساۋدا-ويىن-ساۋىق ورتالىقتارىنىڭ تەڭ يەسى بولىپ تابىلادى.
بۇعان دەيىن قازاقستان ۇكىمەتى قايرات بورانباەۆتىڭ 42،5 ملرد تەڭگەگە فارماسەۆتيكالىق جوباسىن ماقۇلداعانى حابارلانعان بولاتىن.