Қазақстан Республикасының Денсаулық сақтау министрі Ақмарал Әлназарова Ұлытау облысының әкімі Есет Байкенмен бірге Жезқазғанның Батыс ауданында салынып жатқан жаңа емхананың құрылыс алаңын аралап көрді. Ауданы 8,4 мың шаршы метр болатын үш қабатты ғимарат ауысымына 250 адамды қабылдауға есептелген, деп хабарлайды infohub.kz сайты.
Жоба Болат Өтемұратовтың «Верный Капитал» компаниялар тобына кіретін Beeline цифрлық операторының қолдауымен жүзеге асырылып жатыр. Топ ұзақ мерзімді нәтиже беретін тұрақты шешімдерге және Қазақстан халқының өмір сүру сапасын арттыруға бағытталған әлеуметтік және инфрақұрылымдық жобаларды жүйелі түрде жүргізіп келеді. Beeline Қазақстанда атап өткендей, қайырымдылық қызметті оператор өзінің Zhyly Zhurek Foundation қоры арқылы жүзеге асырады. Қор өкілдері құрылыстың барысы мен оның негізгі кезеңдері туралы әңгімеледі. Кездесуге қатысушылар емхананы заманауи медициналық жабдықтармен жарақтандыру және нысанды пайдалануға беруге дайындау мәселелерін де талқылады.
«Бүгін біз елдің медициналық инфрақұрылымын дамытудың жаңа кезеңіне өтіп отырмыз. Бұл — жай ғана жаңа ғимараттар салу емес, әр өңірдің қажеттіліктері мен өсу перспективаларын ескере отырып, заманауи әрі қолжетімді денсаулық сақтау жүйесін қалыптастыру. Жезқазғандағы жаңа емхана қаланың дамып келе жатқан ауданы үшін маңызды әлеуметтік нысанға айналады. Тұрғындар сапалы бастапқы, консультациялық-диагностикалық және мамандандырылған көмекті тұрғылықты жеріне жақын жерде, алыс қашықтықты басып өту қажеттілігінсіз ала алуы тиіс», – деді құрылыс алаңын аралау барысында денсаулық сақтау министрі Ақмарал Әлназарова.
Емханада консультациялық-диагностикалық кабинеттер, күндізгі стационар, сәулелік диагностика бөлімшесі, клиникалық-диагностикалық зертхана, амбулаториялық хирургия орталығы және әйелдер консультациясы орналасады. Жанында тоғыз бригадаға арналған жеке жедел медициналық жәрдем станциясы салынады.
Батыс аудан – Жезқазғанды дамытудың негізгі алаңдарының бірі. Мұнда 80-нен астам көпқабатты тұрғын үй салу жоспарланып отыр, ал аудан халқы болашақта 18 мың адамға жетеді. Емхана ол үшін негізгі әлеуметтік нысанға айналып, қаланың қолданыстағы медициналық мекемелеріне түсетін жүктемені азайтады. Сонымен қатар нысан «Верный Капитал» компаниялар тобының Жезқазғандағы алғашқы әлеуметтік жобасы болмайды. Бұған дейін, 2026 жылдың маусымында, дәл осы ауданда құны 4 млрд теңге болатын, күніне 600 балаға дейін қабылдауға есептелген «Шабыт» заманауи балалар мен жасөспірімдер шығармашылық орталығы ашылған болатын.
«Емхана құрылысы — адамдар үшін тең мүмкіндіктер жасау миссиясын көздейтін қорымыздың ең маңызды жобаларының бірі. Біз қай жерде тұрса да, әр адам сапалы медициналық көмекке қол жеткізуі тиіс деп сенеміз. Бізге жай ғана заманауи ғимарат тұрғызу емес, күн сайын Жезқазған тұрғындарына пайда әкелетін медициналық мекеме құру маңызды. Біз өңірлердің әлеуметтік инфрақұрылымын дамытуға жүйелі түрде қатысып, адамдардың өмір сүру сапасын ұзақ мерзімді жақсартуға ықпал ететін жобаларды қолдаймыз», – деп атап өтті Zhyly Zhurek Foundation директоры Анар Жұмағұлова.
Емхана құрылысы жалғасып жатыр. Пайдалануға берілгеннен кейін ол Жезқазғанның бастапқы медициналық-санитарлық көмек жүйесінің бөлігіне айналады, ал Батыс аудан тұрғындары үйіне жақын жерде заманауи медициналық көмекке қол жеткізеді.