قازاقستاندا مەملەكەت باعاسىن رەتتەيتىن دارىلىك زاتتاردىڭ ءتىزىمى قايتا قارالدى. دەنساۋلىق ساقتاۋ مينيسترلىگىنىڭ مالىمدەۋىنشە، 1 200-دەن استام ارزان پرەپارات بۇدان بىلاي نارىقتىق باعامەن ساتىلادى، دەپ حابارلايدى infohub.kz سايتى.
مەملەكەتتىك باعا رەتتەۋىنەن قۇنى ءبىر ايلىق ەسەپتىك كورسەتكىشتەن — 4 325 تەڭگەدەن اسپايتىن دارىلەر شىعارىلادى. جاڭارتىلعان تىزىمدە مەملەكەتتىك باعا رەتتەۋىنە جاتاتىن پوزيسيالار سانى 3 039-نان 1 827-گە قىسقاردى.
«جاڭارتىلعان تىزىمگە سايكەس مەملەكەتتىك باعا رەتتەۋىنە جاتاتىن پوزيسيالار سانى 3 039-نان 1 827-گە قىسقاردى»، — دەلىنگەن ۆەدومستۆو حابارلاماسىندا.
مينيسترلىكتىڭ تۇسىندىرۋىنشە، مەملەكەتتىك رەتتەۋ ناقتىراق بولا ءتۇسىپ، حالىقتىڭ قولجەتىمدىلىگىن قوسىمشا قورعاۋدى قاجەت ەتەتىن دارىلىك زاتتارعا باعىتتالادى.
دارىلەردىڭ ءبىر بولىگىن نارىقتىق باعاعا كوشىرۋ فارماسەۆتيكالىق نارىقتى باقىلاۋدى كۇشەيتۋمەن قاتار جۇرەدى. دەنساۋلىق ساقتاۋ مينيسترلىگى قازاقستان رەسپۋبليكاسىنىڭ باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ، باعالاردى باقىلاۋ جانە تەكسەرۋ تەتىكتەرىن، ونىڭ ىشىندە تاۋارلاردى تاڭبالاۋ جانە قاداعالاۋ اقپاراتتىق جۇيەسىن پايدالانۋ ارقىلى پىسىقتاپ جاتىر.
سيفرلىق قۇرالدار دارىلىك زاتتاردىڭ قوزعالىسىن قاداعالاۋعا جانە ولاردىڭ اينالىمنىڭ ءارتۇرلى كەزەڭدەرىندەگى ناقتى باعالارىن تالداۋعا مۇمكىندىك بەرەدى. «بۇل باعانىڭ نەگىزسىز كوتەرىلۋىنىڭ ىقتيمال بەلگىلەرىن ۋاقتىلى انىقتاۋعا مۇمكىندىك بەرەدى. 2024 جىلدىڭ شىلدەسىندە مىندەتتى تاڭبالاۋ باستالعاننان بەرى جۇيەدەن شامامەن 1،1 ملرد قاپتاما دارىلىك زات ءوتتى»، — دەپ اتاپ ءوتتى ۆەدومستۆودا.
دەنساۋلىق ساقتاۋ مينيسترلىگىندە قازاقستاندىقتار ءۇشىن دارىلىك زاتتاردىڭ باعالىق قولجەتىمدىلىگىن قامتاماسىز ەتۋ جۇمىسى جالعاساتىنىن ايتتى. بەلگىلەنگەن شەكتى بولشەك ساۋدا باعاسىنان اسىپ كەتۋ فاكتىلەرى انىقتالسا، ازاماتتار DariKZ ءموبيلدى قوسىمشاسى ارقىلى راستايتىن ماتەريالدارمەن — تاۋار چەگىمەن جانە دارىلىك زاتتىڭ قاپتاماسىمەن — قازاقستان رەسپۋبليكاسى دەنساۋلىق ساقتاۋ مينيسترلىگىنىڭ مەديسينالىق جانە فارماسەۆتيكالىق باقىلاۋ كوميتەتىنىڭ اۋماقتىق دەپارتامەنتتەرىنە ءوتىنىش جىبەرە الادى.
بۇعان دەيىن قازاقستاندا بەس جۇزدەن استام دارىلىك پرەپاراتتىڭ باعاسى ارزانداعانى حابارلانعان بولاتىن.