«ميسس الەم — 2026» سۇلۋلىق بايقاۋىنىڭ جەڭىمپازى دومينيكان رەسپۋبليكاسىنىڭ 24 جاستاعى دجوحەيرري مولا اتاندى. فينال ۆەتنامنىڭ نياچانگ قالاسىندا ءوتىپ، بايقاۋدىڭ 75 جىلدىعىنا ورايلاستىرىلدى، دەپ حابارلايدى infohub.kz سايتى.
بايقاۋدىڭ رەسمي سايتىندا اتاپ وتىلگەندەي، مولا پەداگوگ جانە جۋرناليست بولىپ جۇمىس ىستەيدى، سونىمەن قاتار قوعامدىق جوبالارعا بەلسەندى قاتىسادى. جەڭىمپازعا ءتاجدى بىلتىرعى تيتۋل يەگەرى — تايلاند وكىلى وپال سۋچاتا چۋانگسري تابىس ەتتى.
ءبىرىنشى ۆيسە-ميسس يسپانيالىق ەليزابەت رەينەس، ەكىنشىسى — مالايزيا وكىلى تاانۋسيا چەتتي اتاندى. دومينيكان رەسپۋبليكاسى ءۇشىن بۇل بايقاۋ تاريحىنداعى ەكىنشى جەڭىس: العاش رەت تيتۋلدى 1982 جىلى مارياسەلا الۆارەس يەلەنگەن ەدى.
قازاقستان اتىنان بايقاۋعا Miss Qazaqstan 2024 تيتۋلىنىڭ يەگەرى باعىم بالتاباەۆا قاتىستى. وسكەمەننەن شىققان 23 جاستاعى قاتىسۋشى سارسەن امانجولوۆ اتىنداعى شىعىس قازاقستان ۋنيۆەرسيتەتىن «باستاۋىش سىنىپ پەداگوگى» ماماندىعى بويىنشا بىتىرگەن. حالىقارالىق سىنعا بالتاباەۆا ۇلتتىق بەينە دايىندادى، ونىڭ باستى سيمۆولى — قازاق ايەلىنىڭ سۇلۋلىعىن، نازىكتىگىن، دانالىعى مەن ىشكى كۇشىن بەينەلەيتىن اققۋ. الايدا قازاقستاندىق قاتىسۋشى فينالدىق توپ-40-قا ەنە المادى.
بيىل اتاق ءۇشىن 111 قاتىسۋشى ب ا ق سىنادى. فينال العاش رەت ۆەتنامدا ءوتتى — شوۋ نياچانگتا تەڭىز جاعاسىنداعى اشىق الاڭدا ۇيىمداستىرىلدى. بايقاۋ ءىس-شارالارى ءتورت اپتاعا سوزىلدى. نەگىزگى كەزەڭدەردىڭ ءبىرى Beauty With a Purpose باعدارلاماسى بولدى، ونىڭ اياسىندا قىزدار الەۋمەتتىك جانە قايىرىمدىلىق جوبالارىن تانىستىردى. بۇل باعىتتىڭ باس جۇلدەسىن جالپى ەسەپتە ەكىنشى ورىندى يەلەنگەن مالايزيا وكىلى تاانۋسيا چەتتي الدى.