ميسسۋري شتاتىندا سايلاۋ الدىنداعى جانجال كەڭىنەن تالقىلانۋدا. رەسپۋبليكالىق پارتيادان ۇمىتكەر توماس روسس قارسىلاسى لۋيزا سەكەرگە ەسىرتكى تاعۋعا ارەكەت جاسادى دەگەن ايىپپەن قاماۋعا الىندى. بۇل تۋرالى infohub.kz سايتى حابارلايدى.
پروكۋراتۋرانىڭ مالىمەتىنشە، ماۋسىم ايىندا روسس ءوزىنىڭ بۇرىنعى سايلاۋالدى مەنەدجەرىنە (قۇجاتتاردا «CS» دەپ بەلگىلەنگەن) كوكاين مەن اددەرالل ۇسىنعان. ولار بىرلەسىپ، بۇل ەسىرتكىنى سەكەردىڭ سومكەسىنە نەمەسە كولىگىنە جاسىرۋدى جوسپارلاعان. 21 ماۋسىمدا روسس جوسپاردىڭ ورىندالۋ بارىسىن سۇراعان. «زاتپەن ساتتىلىك بولمادى ما؟» دەپ جازعان ول ءوز قىزمەتكەرىنە. تەرگەۋشىلەردىڭ ايتۋىنشا، «زات» دەگەنى ەسىرتكىنى بىلدىرەتىن ەۆفەميزم بولعان.
قىزمەتكەردىڭ جاۋابى سوت قۇجاتتارىندا كەلتىرىلگەن: «ءقازىر كولىك كورمەسىنە قاراي بارا جاتىرمىن، ءسىزدىڭ كولىگىڭىزدى كورۋگە تىرىسامىن. ەسىرتكىنى بىرنەشە كۇن بويى وزىمدە ۇستاپ ءجۇرمىن، كەز كەلگەن مۇمكىندىكتى پايدالانۋعا دايىنمىن. ۋولتەر بار فورۋمدا جاقىنداي المادىم، كولىك ق ۇلىپتاۋلى ەدى».
دجوپلين پوليسياسى 30 شىلدەدە فەدەرالدىق تەرگەۋ بيۋروسىنا (فتب) جەمقورلىق تۋرالى حابارلاعان. پوليسيانىڭ بۇل جوسپار تۋرالى قالاي بىلگەنى بەلگىسىز. كەلەسى كۇنى فتب قىزمەتكەرگە جاسىرىن تىڭداۋ قۇرىلعىسىن بەرىپ، ول روسسپەن اڭگىمەسىن جازىپ العان. قىزمەتكەر سەكەردىڭ كولىگىندە ەسىرتكى بار دەگەن ءانونيمدى حابارلاما جاساۋدى ۇسىنىپ، روسستىڭ پىكىرىن سۇراعان. روسس: «ەگەر جاساي الساڭ، جاسا»، — دەپ جاۋاپ بەرگەن.
روسسقا ەسىرتكى تاراتۋعا قاستاندىق جاسادى دەگەن ايىپ تاعىلۋدا. بۇرىنعى مەنەدجەرگە قاتىستى ايىپ تاعىلۋى مۇمكىن بە، ازىرگە بەلگىسىز. سەكەر تەلەفون قوڭىراۋىنا جاۋاپ بەرمەگەن.
تامىز ايىندا روسس 161-وكرۋگ بويىنشا رەسپۋبليكالىق پرايمەريزدە سەكەردى نەبارى 33 داۋىس ايىرماشىلىعىمەن جەڭگەن. بۇل وكرۋگكە سپرينگفيلدتەن 112 شاقىرىم باتىستا ورنالاسقان دجوپلين قالاسى كىرەدى. قازىرگى وكىل، رەسپۋبليكاشى لەين روبەرتس قايتا سايلاۋعا تۇسپەيدى.
ميسسۋري رەسپۋبليكالىق پارتياسىنىڭ ءتوراعاسى پيتەر كيندەر روسستى سايلاۋدان باس تارتۋعا شاقىردى. «روسس زاڭدى پروسەسكە قۇقىلى جانە بۇل ماسەلەنىڭ ءمان-جايى انىقتالۋى كەرەك، الايدا ونىڭ قاماۋعا الىنۋى وتە كۇردەلى جانە الاڭداتارلىق جاعداي»، — دەدى كيندەر مالىمدەمەسىندە. «161-وكرۋگ تۇرعىندارى ءوز سەنىمىنە يە بولا الاتىن جانە دجەففەرسون-سيتيدە ولاردىڭ مۇددەسىن تولىق قورعاي الاتىن ۇمىتكەردى لايىقتى».