2026 جىلدىڭ العاشقى ءۇش ايىندا مەملەكەتتىك كىرىستەر كوميتەتى سالىقتىق تەكسەرۋلەر قورىتىندىسى بويىنشا كاسىپكەرلەرگە 109،7 ملرد تەڭگە سالىق ەسەپتەدى. بۇل سومانىڭ 29،3 ملرد تەڭگەسى بيۋدجەتكە ءوندىرىلدى: 11،1 ملرد تەڭگەسى جاڭا ەسەپتەۋلەر بولسا، 18،2 ملرد تەڭگەسى وتكەن جىلدارداعى تەكسەرۋ اكتىلەرى بويىنشا جينالدى، دەپ حابارلايدى infohub.kz.
جالپى، 2026 جىلدىڭ ءبىرىنشى توقسانىندا مەملەكەتتىك كىرىس ورگاندارى 6 496 سالىقتىق تەكسەرۋ جۇرگىزدى. كوبىنەسە فيسكالدار قارسى تەكسەرۋلەر ۇيىمداستىردى – ولاردىڭ سانى 3 118 بولدى. سونداي-اق ينسپەكتورلار جەكەلەگەن ماسەلەلەر بويىنشا 1 739 تاقىرىپتىق تەكسەرۋ، 1 184 قاراپايىم تاقىرىپتىق جانە 252 كەشەندى تەكسەرۋ جۇرگىزدى. بۇدان باسقا، مكك قىزمەتكەرلەرى 143 حرونومەتراجدىق زەرتتەۋ جۇرگىزىپ، 60 باقىلاۋ اكتىسىن جاسادى.
سالىستىرۋ ءۇشىن، 2025 جىلدىڭ بارلىق كەزەڭىندە سالىق ورگاندارى 38 392 تەكسەرۋ جۇرگىزىپ، بيزنەسكە 292،2 ملرد تەڭگە سالىق ەسەپتەگەن بولاتىن. سول كەزدە وندىرىلگەن قاراجاتتىڭ جالپى كولەمى 97،8 ملرد تەڭگەگە جەتتى، ونىڭ 54،9 ملرد تەڭگەسى اعىمداعى تولەمدەرگە، ال 42،9 ملرد تەڭگەسى وتكەن جىلدارداعى تەكسەرۋلەر بويىنشا قارىزدارعا تيەسىلى بولدى.
وتكەن جىلعى تەكسەرۋلەردىڭ قۇرىلىمى كەلەسىدەي بولدى: ەڭ كوبى جەكەلەگەن ماسەلەلەر بويىنشا تاقىرىپتىق تەكسەرۋلەر (17 422) جانە قارسى تەكسەرۋلەر (11 891) جۇرگىزىلدى. قاراپايىم تاقىرىپتىق تەكسەرۋلەر 6 431 جاعدايدى قۇراسا، كەشەندى تەكسەرۋلەر – 1 796. سونىمەن قاتار، فيسكالدار 741 حرونومەتراجدىق زەرتتەۋ جۇرگىزىپ، 111 باقىلاۋ اكتىسىن جازىپ بەردى.
بۇعان دەيىن «كۋرسيۆ» دمك وڭايلاتىلعان رەجيمدەگى جك ارقىلى سالىق تولەۋدەن جالتارۋ سحەمالارىن انىقتاعانىن جازعان بولاتىن.