پروديۋسەر ءارى ءانشى ءمولدىر مۇقان ءۇش قۋانىشتى ءبىر مەرەكەگە بىرىكتىرىپ، سالتاناتتى توي وتكىزدى: ۇلكەن قىزى ادەميدىڭ ۋنيۆەرسيتەت ءبىتىرۋى، ەكىنشى قىزى ايىمنىڭ مەكتەپ ءبىتىرۋى جانە كەنجە ۇلى رايىمبەكتىڭ سۇندەت تويى. بۇل تۋرالى infohub.kz سايتى حابارلايدى.
ءانشى جاقىندارىن جيناپ، بالالارىنىڭ جەتىستىكتەرىن اتاپ ءوتتى. «وتان — وتباسىنان باستالادى دەپ وسكەن قىزدارىڭىزبىن عوي. بالالارىمنىڭ قۋانىشىنا ارناپ، جاقىندارىمدى جيناپ، باتالارىن الىپ، تىلەكتەرىن تىڭداپ، ءار جاقسى ءسوزدى جاراتقان يەم، قابىل ەتە كور دەپ ىشىمنەن قايتالاپ ءجۇردىم. وتباسىمنىڭ تويىن — وتانىمنىڭ استانا كۇنىمەن قاتار تويلاۋ بۇيىرعان ەكەن. وسى كۇنى سىزدەر دە مەنىمەن بولعاندارىڭىز ءۇشىن، قوناقتارىما دا، ينستاوقىرماندارىما دا شەكسىز العىس ايتامىن»، — دەپ جازدى ءمولدىر مۇقان.
استانا كۇنىنە وراي ءانشى مۇراعاتتاعى سۋرەتىن جاريالاپ، نۇرسۇلتان نازاربايەۆ تۋرالى ەستەلىكتەرىمەن ءبولىستى. «استانامدى قاتتى جاقسى كورەمىن. بەس پەرزەنتىمنىڭ ومىرگە كەلگەن قالاسى، جاستىعىمنىڭ كۋاسى. 2000 جىلى وقۋعا ءتۇسىپ، وسى قالامەن بىرگە مەن دە ءوستىم. قالام دا جايناپ جارقىراپ تۇر، ەلىمىز دە وركەندەپ ءوسىپ جاتىر. ءار كىرپىشىن جاقسى كورەمىن، ءار تۇرعىنى مەنىڭ تۋعانىمداي دەپ تە ايتا الامىن. وسى اتاۋلى مەيرامنىڭ قۇرمەتىنە مەنىڭ دە مۇراعاتىمدا ساقتالىپ تۇرعان بەينەمەن تاعى بولىسكىم كەلدى. استانا قالاسىنا تىكەلەي قاتىسى بار ەلباسىمەن وسىنداي ەستەلىك بار. ول كىسىنىڭ قولىنان ۇستاپ تۇرعان سۇيكىمدى تومپيعان قارا قىز — ايىم»، — دەدى ءانشى.
ءمولدىر مۇقان ءۇش قۋانىشتىڭ ءبىرى — قىزى ايىمنىڭ مەكتەپ ءبىتىرۋى ەكەنىن اتاپ ءوتتى. «3 قۋانىش — 1 توي دەگەن اتاۋمەن بولعان مەرەكەمدەگى ءبىر قۋانىشىم قازىرگى وسى اپپاق قىزىم ايىمنىڭ مەكتەپ ءبىتىرۋى ەدى. سۇلۋىم، ونەرلىم، ەڭبەكقورىم، جولىڭ اشىق بولسىن. سەن مەنىڭ دۇعامداسىڭ، قىزىم! جۇلدىزىڭ جارقىراي بەرسىن، باعىڭ بەس ەلى بولسىن»، — تىلەدى ول.