كاليفورنيادا «الەمدەگى ەڭ سۇلۋ ەمەس يت» اتتى 50ء-شى مەرەيتويلىق بايقاۋ ءوتتى. باس جۇلدەنى وڭتۇستىك كورەياداعى ەت ساۋداسىنان قۇتقارىلعان التى جاسار موپس دجينني لۋ جەڭىپ الدى، دەپ حابارلايدى infohub.kz.
مەرەيتويلىق سايىس كاليفورنيانىڭ سانتا-روزا قالاسىندا ءوتتى. جەڭىمپاز اتانعان دجينني لۋ باسقا قاتىسۋشىلاردان وزىپ، يەسى ميشەل گرەديگە 5000 دوللار كولەمىندەگى جۇلدەنى اپەردى. بۇل ءيتتىڭ بۇل اتاقتى جەڭۋگە ءتورتىنشى ارەكەتى ەدى: وتكەن جولى ول ەكىنشى ورىنعا يە بولعان.
دجينني لۋ وڭتۇستىك كورەيانىڭ تاۋلارىندا ايازدا اعاش جاشىكتە تابىلعان. ونى Pug Rescue ۇيىمىنىڭ ەرىكتىلەرى قۇتقارعان. يەسى ونى ءتورت جىل بۇرىن ۇيىنە العان. ءيتتىڭ باسقا تۋىستارىنان ەرەكشەلىگى — دوڭەس كوزدەرى مەن ۇنەمى سىرتقا شىعىپ تۇراتىن ءتىلى.
شارانى ۇيىمداستىرۋشىلار بايقاۋدىڭ جانۋارلاردى كەلەمەجدەۋ ءۇشىن ەمەس، باسپانالارداعى يتتەرگە نازار اۋدارۋ ءۇشىن وتكىزىلەتىنىن اتاپ ءوتتى. بۇگىندە دجينني لۋ قايىرىمدىلىق باعدارلامالارىنا قاتىسادى: مەكتەپتەرگە، حوسپيستەرگە جانە دەمەنسيامەن اۋىراتىن ناۋقاستاردى كۇتۋ بولىمشەلەرىنە بارادى.
سايىستا ەكىنشى ورىندى پومەران ءشپيسى مەن چيحۋاحۋا بۋدانى پينكي، ال ءۇشىنشى ورىندى چيحۋاحۋا وتتو يەلەندى.