استانا بيلىگى قالا شەتىندە قاجەتتى ينفراقۇرىلىمى جوق جەرلەردە جەر تەلىمدەرىن بولۋگە جانە كوپپاتەرلى تۇرعىن ۇيلەر سالۋعا ۋاقىتشا شەكتەۋ ەنگىزۋدى جوسپارلاپ وتىر، دەپ حابارلايدى infohub.kz سايتى.
استانا قالاسىنىڭ ساۋلەتتىك كەلبەتىن قالىپتاستىرۋ جانە قالا قۇرىلىسىن جوسپارلاۋ قاعيدالارىنا جاڭا وزگەرىستەر ەنگىزۋ جوسپارلانۋدا. بۇل ۇسىنىسپەن قالالىق ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى التىنبەك احمەتوۆ شىقتى.
ءماسليحات شەشىمىنە ەنگىزىلەتىن وزگەرىستەر ق ر پرەمەر-مينيسترىنىڭ ءبىرىنشى ورىنباسارىنىڭ تاپسىرماسىن ورىنداۋ ماقساتىندا ازىرلەندى. نەگىزگى جاڭاشىلدىق قالا شەتىندەگى تۇرعىن ايماقتاردىڭ كەڭەيۋىن قاتاڭ باقىلاۋعا الۋعا باعىتتالعان.
قاعيدالاردى ماگيسترالدىق ينجەنەرلىك جەلىلەرمەن جانە الەۋمەتتىك ينفراقۇرىلىممەن قامتاماسىز ەتىلمەگەن قالا شەتىندەگى اۋماقتاردا 2035 جىلعا دەيىن جەر تەلىمدەرىن بەرۋگە جانە كوپپاتەرلى تۇرعىن ۇيلەر سالۋعا ۋاقىتشا شەكتەۋ قاراستىراتىن تارماقپەن تولىقتىرۋ ۇسىنىلادى.
بۇل شارا تۇرعىن ءۇي كەشەندەرى ينجەنەرلىك كوممۋنيكاسيالاردان، جولداردان، مەكتەپتەر مەن ەمحانالاردان بولەك سالىناتىن قالا شەتىندەگى رەتسىز قۇرىلىستى توقتاتۋعا باعىتتالعان.
ساۋلەت باسقارماسىندا دايىندالعان جوبانىڭ ۋاكىلەتتى مەملەكەتتىك ورگاندارمەن كەلىسۋ راسىمدەرىنەن وتكەنىن جانە قازاقستان رەسپۋبليكاسىنىڭ قولدانىستاعى زاڭناماسىنا تولىق سايكەس كەلەتىنىن اتاپ ءوتتى.
جاڭا نورمانى ىسكە اسىرۋ قالالىق نەمەسە رەسپۋبليكالىق بيۋدجەتتەن قوسىمشا قاراجات ءبولۋدى تالاپ ەتپەيدى. سونىمەن قاتار، سالالىق ۆەدومستۆونىڭ مالىمدەۋىنشە، ەنگىزىلەتىن وزگەرىستەر قۇرىلىس نارىعىنىڭ ادال قاتىسۋشىلارى مەن بيزنەس ءۇشىن اكىمشىلىك كەدەرگىلەر تۋعىزبايدى.