ماروككونىڭ سولتۇستىگىندەگى تەتۋان قالاسىنىڭ سوتى جەتى تاكسي جۇرگىزۋشىسىن يسپانيانىڭ سەۋتا انكلاۆىنا زاڭسىز وتۋگە كومەكتەسكەنى ءۇشىن التى ايعا دەيىن باس بوستاندىعىنان ايىرۋ جازاسىنا كەسىپ، ءارقايسىسىنا 1070 دوللار ايىپپۇل سالدى. بۇل — وتكەن اپتادا سولتۇستىك افريكاداعى شاعىن يسپان ايماعىنا 70 مىڭنان استام ادامنىڭ كىرۋىنە بايلانىستى ماروككوداعى العاشقى سوت ۇكىمى، دەپ حابارلايدى infohub.kz.
ۇكىمگە سايكەس، تاكسي جۇرگىزۋشىلەرى «ماروككولىقتار مەن شەتەلدىكتەردىڭ رۇقسات ەتىلمەگەن شەكارا بەكەتتەرى ارقىلى زاڭسىز كەتۋىنە جاردەمدەسكەنى» جانە «ليسەنزياسىز جولاۋشىلار تاسىمالداعانى» ءۇشىن كىنالى دەپ تانىلدى. ولار كليەنتتەردى شەكاراداعى فنيدەك قالاسىنا جەتكىزگەن. ۇكىم ءماتىنى ادىلەت مينيسترلىگىنىڭ سايتىندا جاريالاندى.
جۇرگىزۋشىلەر دۇيسەنبىدە سوتتالدى. ولار ادۆوكاتسىز سوتقا كەلدى، سەبەبى ەل بويىنشا ادۆوكاتتار ەرەۋىلدە. ولاردىڭ ۇكىمگە شاعىمدانۋ قۇقىعى ساقتالادى. ءبىر كولىك تاركىلەندى.
ماروككو ادام قۇقىقتارى قاۋىمداستىعى جۇما كۇنى سەۋتا وقيعاسىنان كەيىن 111 ادامنىڭ تەرگەۋ يزولياتورىندا وتىرعانىن حابارلادى. ولار جاپپاي ب ۇلىك شىعارۋ، مەملەكەتتىك قىزمەتكەرلەرگە شابۋىل جاساۋ جانە جول قوزعالىسىنا كەدەرگى كەلتىرۋ باپتارىمەن ايىپتالۋدا. ماروككونىڭ ادىلەت مينيسترلىگى مەن پروكۋراتۋرا بۇل ماسەلەگە تۇسىنىكتەمە بەرۋدەن باس تارتتى.
ۇلتتىق تاكسي وداعىن قوسا العاندا، كاسىپوداقتار ۇكىمدى «تاڭقالارلىق جانە قاتال» دەپ باعالادى. ولار ءوز مالىمدەمەسىندە «جولاۋشىلار تاسىمالىنا شەكتەۋ قويۋ تۋرالى رەسمي شەشىم شىعارىلماعانىن» اتاپ ءوتتى. ۇلتتىق تاكسي وداعىنىڭ تەتۋان بولىمشەسىنىڭ باس حاتشىسى ءالي يۋنەس Associated Press اگەنتتىگىنە: «تاكسي جۇرگىزۋشىلەرىن بولعان وقيعاعا جاۋاپتى دەپ ساناۋعا بولمايدى. ولار تەك قوعامدىق قىزمەت كورسەتكەنى ءۇشىن جازالاندى»، — دەدى.
الەۋمەتتىك جەلىلەردە شەكارا اشىق دەگەن جالعان قاۋەسەت پەن ەكونوميكالىق قيىندىقتاردىڭ سالدارىنان ونداعان مىڭ ماروككولىق سولتۇستىك افريكا جاعالاۋىنداعى يسپان قالاسى سەۋتاعا ءوتىپ نەمەسە ءجۇزىپ ءوتتى. بۇل وقيعا بۇكىل ەۋروپادا رەزونانس تۋدىردى. شەكارانىڭ ەكى جاعىندا 80-نەن استام ادام قازا تاپتى. ءتىرى قالعان ميگرانتتاردىڭ بارلىعى دەرلىك يسپان بيلىگى تاراپىنان ەلدەن شىعارىلدى نەمەسە ءوز ەركىمەن قايتتى. شامامەن 1000 كامەلەتكە تولماعان بالا قالدى، ولاردىڭ بولاشاعى بەلگىسىز.
سونىمەن قاتار، ەۋروپالىق وداقتىڭ پوليسيا اگەنتتىگى ەۋروپول جۇما كۇنى يسپان بيلىگىنىڭ جەتەكشىلىگىمەن حالىقارالىق پوليسيا وپەراسياسى باتىس جەرورتا تەڭىزى ارقىلى ميگرانتتاردى، ەسىرتكى مەن قارۋدى تاسىمالدايتىن ءىرى قىلمىستىق جەلىنى جويعانىن حابارلادى. وپەراسيا ناتيجەسىندە ماۋسىم ايىندا يسپانيا مەن الجيردە 78 ادام ۇستالدى، بۇل سەۋتاعا ميگرانتتار اعىنىنان بىرنەشە اپتا بۇرىن بولدى.