قازاقستان، ساۋد ارابياسى، رەسەي، يراك، كۋۆەيت، نيگەريا، الجير جانە ۆەنەسۋەلا ەنەرگەتيكالىق ينفراقۇرىلىمعا جاسالعان شابۋىلدارعا الاڭداۋشىلىق ءبىلدىردى، دەپ حابارلايدى infohub.kz سايتى.
وپەك-تە اتالعان ەلدەر كىرەتىن بىرىككەن مينيسترلىك مونيتورينگ كوميتەتىنىڭ 67ء-شى وتىرىسىنىڭ قورىتىندىسى شىعارىلدى. تاراپتار الەمدىك ەنەرگيا نارىقتارىنىڭ تۇراقتىلىعىن قامتاماسىز ەتۋ ماسەلەلەرىن تالقىلادى.
كوميتەت ەنەرگيا اعىنىنىڭ ۇزدىكسىزدىگىن كەپىلدەندىرۋ ءۇشىن حالىقارالىق تەڭىز جولدارى قاۋىپسىزدىگىنىڭ ماڭىزدىلىعىن ەرەكشە اتاپ ءوتتى. مالىمدەمەدە ەنەرگەتيكالىق ينفراقۇرىلىمعا جاسالعان شابۋىلدارعا الاڭداۋشىلىق بىلدىرىلگەنى ايتىلادى، ويتكەنى زاقىمدالعان نىسانداردى تولىق قۋاتقا دەيىن قالپىنا كەلتىرۋ قىمبات جانە ۇزاق پروسەسس بولىپ تابىلادى، بۇل ەنەرگيامەن جابدىقتاۋدىڭ جالپى قولجەتىمدىلىگىنە اسەر ەتەدى.
ەنەرگيامەن جابدىقتاۋ قاۋىپسىزدىگىنە نۇقسان كەلتىرەتىن كەز كەلگەن ارەكەت، ينفراقۇرىلىمعا شابۋىل نەمەسە حالىقارالىق تەڭىز جولدارىنىڭ بۇزىلۋى بولسىن، نارىقتىڭ قۇبىلمالىلىعىن ارتتىرادى جانە وندىرۋشىلەر، تۇتىنۋشىلار مەن الەمدىك ەكونوميكا مۇددەسىندە تۇراقتىلىقتى قولداۋعا باعىتتالعان ۇجىمدىق كۇش-جىگەردى السىرەتەدى.
ەسكە سالايىق، 30 شىلدەدە كاسپي قۇبىر كونسورسيۋمىنىڭ (كقك) ءباسپاسوز قىزمەتى تەڭىز تەرمينالى اكۆاتورياسىندا تانكەرگە جاسالعان شابۋىل تۋرالى حابارلاپ، ونى تەرروريستىك دەپ اتادى. مارشالل ارالدارىنىڭ تۋى استىنداعى Niffos Sifnos تانكەرى زارداپ شەكتى، جۇك جونەلتۋشى «تەڭىزشەۆرويل» ج ش س («شەۆرون» كومپانياسى، قازاقستان) بولىپ تابىلادى. كەمە الىس ورنالاسقان بەكىتۋ قۇرىلعىسىندا مۇناي تيەۋ كەزىندە بولعان. كەيىن ەنەرگەتيكا مينيسترلىگى كقك جۇمىسىنىڭ تولىق توقتاتىلۋى مۇمكىن دەگەن اقپاراتتى جوققا شىعاردى.