قازاقستان ەنەرگەتيكا مينيسترلىگى كاسپي قۇبىر جەلىسى كونسورسيۋمى (كقك) ارقىلى مۇناي جەتكىزۋدىڭ ۋاقىتشا توقتاتىلۋىنا تۇسىنىك بەردى، دەپ حابارلايدى infohub.kz.
ۆەدومستۆونىڭ ءباسپاسوز قىزمەتىنىڭ تۇسىندىرۋىنشە، كقك تەڭىز تەرمينالىندا تيەۋ وپەراسيالارى قارا تەڭىز اكۆاتورياسىندا كەمەلەر، ەكيپاجدار جانە ەكولوگيا قاۋىپسىزدىگىن قامتاماسىز ەتۋ ماقساتىندا ۋاقىتشا توقتاتىلدى. سونىمەن قاتار كونسورسيۋمنىڭ بارلىق وندىرىستىك-تەحنيكالىق نىساندارى جارامدى كۇيدە، شتاتتىق رەجيمدە جۇمىس ىستەپ تۇر جانە جاعداي قالىپقا كەلگەننەن كەيىن شيكىزات تاسىمالىن قايتا باستاۋعا ءازىر.
«قۇبىر جۇيەسىنە مۇناي قابىلداۋداعى شەكتەۋلەرگە جانە مۇناي ءوندىرۋشى كومپانيالاردىڭ رەزەرۆۋار پاركتەرىنىڭ تولىپ كەتۋىنە جول بەرمەۋ ماقساتىندا تاۋلىكتىك ءوندىرىس دەڭگەيلەرىنە باقىلاۋلى تۇزەتۋ جۇرگىزىلدى، بۇل مۇناي ءوندىرۋ كولەمىنىڭ ۋاقىتشا تومەندەۋىنە اكەلدى. بۇل شارا تەحنولوگيالىق سيپاتقا يە جانە وندىرىستىك پروسەستەردىڭ تۇراقتىلىعىن قامتاماسىز ەتۋگە باعىتتالعان»، — دەپ اتاپ ءوتتى مينيسترلىكتە.
ەنەرگەتيكا مينيسترلىگى كقك باسشىلىعىمەن، ءىرى جۇك جونەلتۋشىلەرمەن، كەمە يەلەرىمەن جانە ءتيىستى مەملەكەتتىك ورگاندارمەن ۇزدىكسىز بايلانىستا ەكەنىن دە جەتكىزدى. «قازىرگى تاڭدا ءقاۋىپسىز كەمە ءجۇزۋ جاعدايىن قامتاماسىز ەتۋ جانە قازاقستاندىق مۇنايدىڭ الەمدىك نارىقتارعا تۇراقتى ەكسپورتىن تەزىرەك قايتا باستاۋ ءۇشىن شەشىمدەر ازىرلەۋ بويىنشا ۇزدىكسىز كەڭەس وتكىزىلىپ جاتىر»، — دەپ ناقتىلادى ۆەدومستۆو.