قازاقستاندا فارماسەۆتيكالىق نارىققا ارنالعان سيفرلىق «ءبىرىڭعاي تەرەزە» جۇمىسىنىڭ العاشقى قورىتىندىلارى شىعارىلدى. قازىرگى ۋاقىتتا قانت ديابەتىن، سەمىزدىكتى جانە ونكولوگيالىق اۋرۋلاردى ەمدەۋگە ارنالعان پرەپاراتتار جەدەل ساراپتاما ساتىسىندا تۇر، دەپ حابارلايدى infohub.kz سايتى.
دەنساۋلىق ساقتاۋ مينيسترلىگىنىڭ مالىمەتىنشە، بيىلعى جىلدىڭ تامىز ايىنىڭ باسىندا دارى-دارمەكتەردى جەدەل ساراپتاۋ اياسىندا 63 كەلىسىمشارت جاسالىپ، تىركەۋگە 20 ءوتىنىم تۇسكەن. ءقازىر ونىڭ التاۋى باستاپقى ساراپتامادان ءوتىپ جاتىر، ال 14ء-ى قاراۋدىڭ كەلەسى كەزەڭىندە.
«تىركەۋ راسىمدەرىنەن ءوتىپ جاتقان پرەپاراتتاردىڭ ىشىندە — „مۋنجارو“ (تيرزەپاتيد)، „ۆەگوۆي“ (سەماگلۋتيد) جانە ىسىككە قارسى „ازاسيتيدين“ پرەپاراتى بار»، — دەلىنگەن حابارلامادا.
سونىمەن قاتار، «ازاسيتيدينگە» بەرىلگەن ءوتىنىم بويىنشا پرەپاراتتى تىركەۋ ءراسىمىن ودان ءارى جالعاستىرۋعا ۇسىنۋ تۋرالى شەشىم قابىلدانعانى اتاپ ءوتىلدى.
«ءبىرىڭعاي تەرەزە» دارى-دارمەكتەردى ستاندارتتى تىركەۋ ءۇشىن دە قولدانىلادى. دەنساۋلىق ساقتاۋ مينيسترلىگىنىڭ دەرەكتەرىنە سايكەس، العاشقى ءتورت ءوتىنىم ءتۇستى. ونىڭ ءبىرى — «Kelun-Kazpharm» ج ش س وندىرەتىن وتاندىق «لەۆوكاز» (لەۆوفلوكساسين) پرەپاراتىنا — مامانداندىرىلعان ساراپتاماعا وتۋگە ۇسىنىلدى.
مەديسينالىق بۇيىمداردى تىركەۋگە كەلەر بولساق، مۇندا ەكى ءوتىنىم بەرىلگەن — Map-iT دياگنوستيكالىق كاتەتەرلەرىنە جانە PAL ۆيبراسيالىق ليپوساكسيا جۇيەسىنە.
ەسكە سالايىق، رەسپۋبليكادا 2025 جىلدىڭ قىركۇيەگىنەن باستاپ دارى-دارمەكتەر مەن مەديسينالىق بۇيىمداردى «ءبىرىڭعاي تەرەزە» قاعيداتى بويىنشا تىركەۋدىڭ سيفرلىق مەحانيزمى جۇمىس ىستەي باستادى. دەنساۋلىق ساقتاۋ مينيسترلىگىندە بۇل جۇيە راسىمدەردەن ءوتۋدىڭ تۇسىنىكتى الگوريتمىن جانە مەملەكەتتىك جۇيەمەن ىڭعايلى ءوزارا ءىس-قيمىلدى قامتاماسىز ەتەتىنىن اتاپ وتەدى.
بۇعان دەيىن «كۋرسيۆ» وڭتۇستىك كورەيادا «Ozempic بەتى» ماسەلەسىن شەشۋگە ارنالعان پرەپارات جاسالعانىن جازعان بولاتىن.