مۋزتاۋ (بەلۋحا) تاۋىنىڭ ەتەگىنە جەتپەك بولعان قازاقستاندىقتار باتپاقپەن جۇرۋگە ءماجبۇر. كاتون-قاراعاي ۇلتتىق پاركى رەسەي فەدەراسياسىمەن مەملەكەتتىك شەكاراعا جاقىندىعىنا بايلانىستى ىڭعايلىراق مارشرۋت سالۋدى جوسپارلاپ وتىرعان جوق، دەپ حابارلايدى infohub.kz سايتى.
ۇلتتىق پارك «كۋرسيۆكە» تۇسىندىرگەندەي، ونىڭ اۋماعىندا بارلىعى 14 تۋريستىك مارشرۋت بار. ال «اق بەرەل» سوقپاعى مۋزتاۋ ەتەگىنە اپاراتىن ەڭ قىسقا جول بولىپ قالا بەرەدى.
الايدا تاۋعا بارار جولدىڭ ءبىر بولىگى رەسەي اۋماعىمەن وتەتىندىكتەن، تۋريستەر قازاقستاندىق جاقتا باتپاقتى ءارى جۇرۋگە قيىن جەرمەن اينالما جول جۇرۋگە ءماجبۇر. ءدال وسى اۋماقتىڭ شەكارالىق مارتەبەسىنە بايلانىستى ۇلتتىق پارك جاڭا مارشرۋت سالۋدى جوسپارلامايدى.
«يازەۆوە كولىنەن سارسەمباي شاتقالىنا دەيىنگى ارالىقتا بالاما مارشرۋت جاساۋ نۇسقالارى ۇلتتىق پارك تاراپىنان قاراستىرىلمايدى. بۇل جەر بەدەرىنىڭ جۇرۋگە قيىندىعىمەن جانە مارشرۋتتىڭ قاسىنان وتەتىن رەسەي فەدەراسياسىمەن مەملەكەتتىك شەكارانىڭ جاقىندىعىمەن بايلانىستى»، — دەدى ۆەدومستۆودا.
بۇعان دەيىن «كۋرسيۆ» التايداعى قازاقستان-رەسەي شەكاراسىن بەلگىلەۋ جۇمىستارىن 2026 جىلدىڭ سوڭىنا دەيىن تولىق اياقتاۋدى جوسپارلاپ وتىرعانىن جازعان. قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى مۋزتاۋ تاۋىنىڭ باسىنداعى دەماركاسيانىڭ قورىتىندى كەزەڭى تانىمال تۋريستىك مارشرۋتقا كىرۋدى بوگەمەيتىنىنە سەندىردى.