قاراعاندى وبلىسىنداعى بەسشوقى جانە اقمولا وبلىسىنداعى قىزىلتۋ كەن ورىندارىنىڭ جاڭا بايىتۋ كاسىپورىندارىندا جىلىنا 200 مىڭ تونناعا جۋىق مىس كونسەنتراتىن الۋ جوسپارلانۋدا، دەپ حابارلايدى infohub.kz سايتى.
ونەركاسىپ جانە قۇرىلىس مينيسترلىگىنىڭ مالىمەتىنشە، جاڭا بايىتۋ فابريكالارىندا جىلىنا شامامەن 190 مىڭ توننا مىس كونسەنتراتى وندىرىلەدى. ولاردى جوبالاۋعا ارنالعان تەحنولوگيالىق شەشىمدەردى «قازاقستان رەسپۋبليكاسىنىڭ مينەرالدى شيكىزاتتى كەشەندى قايتا وڭدەۋ جونىندەگى ۇلتتىق ورتالىعى» رمك فيليالى – «ءتۇستى مەتالداردىڭ شىعىس عىلىمي-زەرتتەۋ تاۋ-كەن مەتاللۋرگيا ينستيتۋتى» (ۆنييسۆەتمەت) ماماندارى ازىرلەدى. ەكى كاسىپورىننىڭ جالپى وڭدەۋ قۋاتى جىلىنا 10،5 ملن توننا كەندى قۇرايدى.
ۆنييسۆەتمەت ماماندارى بەسشوقى كەن ورنىنىڭ ءمىس-پورفيرلى كەندەرىن جانە قىزىلتۋ كەن ورنىنىڭ مىس-موليبدەندى كەندەرىن فلوتاسيالىق بايىتۋ تەحنولوگيالارىن جاسادى. بۇل تەحنولوگيالىق شەشىمدەر جاڭا بايىتۋ فابريكالارىن جوبالاۋ رەگلامەنتتەرىنە ەنگىزىلدى.
بەسشوقى ءۇشىن جىلىنا 7،5 ملن توننا كەن وڭدەيتىن، قۇرامىندا مىس مولشەرى 25% بولاتىن شامامەن 142 مىڭ توننا مىس كونسەنتراتىن شىعاراتىن كاسىپورىن كوزدەلگەن. بۇعان دەيىن كەن ورنىنىڭ رەسۋرستارى 2،6 ملن توننا مىسقا باعالانعان، سونداي-اق وندا التىن دا بار.
بەسشوقى كەن ورنىندا Ulmus Besshoky («ۋلمۋس بەسشوكى») كومپانياسى بارلاۋ جۇرگىزگەنى حابارلانعان بولاتىن. جاريالانىم كەزىندە كومپانيانىڭ تۇپكىلىكتى يەلەرى رەتىندە قازاقستاندىق كاسىپكەر تيمۋر يسايەۆ پەن شەتەلدىك بحامرە پراساد كورسەتىلگەن (كومپانيا ەسەپتىلىگىندە ازاماتتىعى كورسەتىلمەگەن، ءبىراق ونىڭ قازاقستاندا تۇرۋعا رۇقساتى بار، بۇرىن بجزق ديرەكتورلار كەڭەسىنىڭ قۇرامىندا بولعان). سونىمەن قاتار، 2025 جىلدىڭ سوڭىندا التىن ءوندىرۋشى Solidcore Resources Ulmus Besshoky-دىڭ 10،2% اكسياسىن ساتىپ العانى مالىمدەلگەن.
Ulmus Besshoky گەولوگيالىق بارلاۋ جۇمىستارىمەن اينالىسقان جانە 2024-2025 جىلدارى كىرىسى بولماعان، ال ونىڭ شىعىنى تيىسىنشە 329،2 ملن جانە 403،5 ملن تەڭگەنى قۇراعان. 2025 جىلدىڭ سوڭىندا قارجىلىق ەسەپتىلىكتە كومپانيانىڭ تۇپكىلىكتى يەسى رەتىندە «استانا» حالىقارالىق قارجى ورتالىعىنىڭ ديرەكتورلار كەڭەسىنىڭ مۇشەسى بولعان قازاقستاندىق نۇرلان قۇسايىنوۆ كورسەتىلگەن، ول بۇعان دەيىن قازاقستاننىڭ دامۋ بانكىن باسقارعان.
قىزىلتۋ ءۇشىن جىلىنا 3 ملن توننا كەن وڭدەۋدى جانە قۇرامىندا مىس مولشەرى 21% بولاتىن شامامەن 48 مىڭ توننا مىس كونسەنتراتىن الۋدى كوزدەيتىن رەگلامەنت ازىرلەنىپ، جوبالاۋعا ەنگىزۋگە بەرىلدى. بۇعان دەيىن كەن ورنىنىڭ رەسۋرستارى 132،2 ملن توننا مىس كەنىنە باعالانعان، وندا التىن مەن كۇمىس تە بار.
2026 جىلى ماماندار بوزشاكول جانە كارچيعا مىس بايىتۋ فابريكالارىنىڭ تەحنولوگيالىق رەگلامەنتتەرىن وڭدەلەتىن كەندەردىڭ مينەرالدىق قۇرامىنىڭ ەرەكشەلىكتەرى مەن وندىرىستىك جاعدايلاردى ەسكەرە وتىرىپ تۇزەتۋدە.
«زەرتحانالىق فلوتاسيالىق ماشينالاردا ماماندار كەندى ۇساقتاۋ ۇساقتىعىنىڭ اسەرىن زەرتتەپ، فلوتاسيانىڭ وڭتايلى رەجيمدەرىن تاڭداپ، پىسىقتايدى. الىنعان ناتيجەلەر مىستىڭ الىنۋىن ارتتىرۋعا مۇمكىندىك بەرەدى جانە وسى بايىتۋ فابريكالارىنىڭ جۇمىسىن جەتىلدىرۋ كەزىندە قولدانىلاتىن بولادى»، — دەپ اتاپ ءوتتى «ق ر مشقۇو» رمك «ۆنييسۆەتمەت» فيليالىنىڭ قولدانبالى زەرتتەۋلەر جانە سىناقتار جونىندەگى ديرەكتوردىڭ ورىنباسارى لاريسا كۋشاكوۆا.
ينستيتۋتتىڭ ازىرلەمەلەرى جاڭا بايىتۋ فابريكالارىن سالۋعا جانە قازاقستاننىڭ مىس سالاسىنىڭ تيىمدىلىگىن ارتتىرۋعا تەحنولوگيالىق نەگىز جاسايدى.