مىسىرلىق تەلەجۇرگىزۋشى سارا حاليفا مەن تاعى 11 ادام ەسىرتكىگە قاتىستى ايىپتار بويىنشا ءولىم جازاسىنا كەسىلدى. بۇل تۋرالى مەملەكەتتىك «ال-احرام» گازەتى حابارلادى.
سوت ۇكىمىنە سايكەس، ولار ەسىرتكى جاساۋعا ارنالعان شيكىزاتتى ساتۋ ماقساتىندا يمپورتتاعان قىلمىستىق توپتىڭ مۇشەلەرى بولعان. سونداي-اق، ولاردىڭ قولىندا زاڭسىز قارۋ-جاراق پەن وق-دارىلەر بولعان.
39 جاستاعى حاليفا «مۇمكىن ەمەس ميسسيا» اتتى قىلمىس تاقىرىبىنداعى تەلەباعدارلاماسىمەن تانىمال. ول وزىنە تاعىلعان ايىپتاردى جوققا شىعاردى.
ۇكىمگە شاعىمدانۋعا بولادى. العاشقى ۇكىم وتكەن ايدا جاريالانعان ەدى. الايدا، ول ءبىر ايدان كەيىن عانا راستالدى، سەبەبى سوت ءولىم جازاسىنا قاتىستى زاڭ تالابىنا سايكەس مىسىردىڭ باس مۇفتيىنەن ءدىني كەڭەس الدى.
سوت پروسەسى بارىسىندا بيلىك 750 كەلىدەن استام ەسىرتكى جانە ولاردى جاساۋعا ارنالعان شيكىزاتتى تاركىلەگەنى ايتىلدى. پروكۋراتۋراعا 20 كۋاگەر مالىمدەمە بەرگەن، سونداي-اق، اڭگىمەلەر مەن بەينەجازبالاردى قامتيتىن ەلەكتروندى دالەلدەمەلەر دە ۇسىنىلعان.
مەملەكەتتىك «احبار ال-يوم» گازەتىنىڭ مالىمەتىنشە، وتكەن جىلعى قىركۇيەكتەگى سوت وتىرىسىندا سۋديا ونىڭ ىسكە قاتىسى تۋرالى سۇراعاندا، حاليفا ەسىرتكىگە قارسى ورگاننىڭ كەڭسەسىندە ونىمەن بىرگە سۋرەتكە تۇسكەنگە دەيىن ەشقاشان ەسىرتكى كورمەگەنىن ايتقان.
Amnesty International ۇيىمىنىڭ 2025 جىلعى ەسەبىنە سايكەس، جىل ىشىندە 492 ءولىم جازاسى ۇكىمى شىعارىلعان، ونىڭ 23ء-ى ورىندالعان. ەسەپتە ايتىلعانداي، سوتتالۋشىلار ەسىرتكى ساۋداسى جانە زورلاۋ بويىنشا كىنالى دەپ تانىلعان، بۇل حالىقارالىق قۇقىق پەن ستاندارتتارعا سايكەس ءولىم جازاسىن قولدانۋعا بولمايتىن «قاساقانا كىسى ولتىرۋگە» جاتپايدى.