بيىلعى ەكىنشى توقساندا قازاقستاندا ءبىر قىزمەتكەردىڭ ورتاشا ايلىق جالاقىسى 486 388 تەڭگەنى قۇراپ، ءبىر جىلدا نومينالدى تۇردە 8،4%-عا وسكەنىن infohub.kz سايتى حابارلايدى.
الايدا ينفلياسيانىڭ جوعارى قارقىنىنا بايلانىستى ناقتى جالاقى 1،8%-عا قىسقاردى. ناقتى جالاقىنىڭ تومەندەۋى 2025 جىلدىڭ شىلدە-قىركۇيەك ايلارىنان بەرى، ياعني قاتارىنان ءتورت توقسان بويى جالعاسىپ كەلەدى، دەپ ەسكە سالادى DataHub. سونىمەن قاتار، قۇلدىراۋ قارقىنى وسى كەزەڭدەگى ەڭ تومەنگى دەڭگەيگە دەيىن باياۋلادى: الدىڭعى ءۇش توقسانداعى ورتاشا كورسەتكىش -2،5% بولعان ەدى. ساراپشىلار ناقتى جالاقىنىڭ تومەندەۋى وسۋگە قاراعاندا سيرەك كەزدەسەتىن ديناميكا ەكەنىن اتاپ وتەدى: اعىمداعى سيكل باستالعانعا دەيىنگى سوڭعى 8،5 جىل ىشىندە تەرىس كورسەتكىشتەر تەك ەكى رەت – 2023 جىلدىڭ ءبىرىنشى توقسانىندا جانە 2020 جىلدىڭ ءۇشىنشى توقسانىندا بايقالعان.
ناقتى جالاقىنىڭ تومەندەۋى ىرىلەندىرىلگەن سالالاردىڭ كوپشىلىگىن – ون التىنىڭ توعىزىن قامتىدى، بۇل سالالاردا ەسەپتەۋلەرگە ەنگىزىلگەن بارلىق قىزمەتكەرلەردىڭ 69%-ى جۇمىس ىستەيدى. ەڭ ۇلكەن قۇلدىراۋ ءبىلىم بەرۋ سالاسىندا (385 725 تەڭگە، ينفلياسيانى ەسكەرە وتىرىپ، جىلدىق كورسەتكىشپەن -6،5%)، ويىن-ساۋىق سالاسىندا (312 136 تەڭگە، -6،3%) جانە اقپارات پەن بايلانىس سالاسىندا (851 076 تەڭگە، -6%) تىركەلدى.
وڭىرلىك بولىنىستە ناقتى كورسەتكىشتە تابىستىڭ تومەندەۋى تەك الماتىنى (610 371 تەڭگە، +0،8%) جانە اباي وبلىسىن (422 043 تەڭگە، +0،3%) اينالىپ ءوتتى، بۇل وڭىرلەرگە ناقتى جۇمىسشىلار سانىنىڭ 18%-ى تيەسىلى. ەڭ كوپ زارداپ شەككەندەر – الماتى (401 457 تەڭگە، -7%)، ۇلىتاۋ (588 691 تەڭگە، -6،6%) جانە تۇركىستان (370 964 تەڭگە، -5،1%) وبلىستارى.
ماۋسىم ايىنىڭ قورىتىندىسى بويىنشا قازاقستاندا جىلدىق ينفلياسيا دەڭگەيى 10،3%-دى قۇراعانىن بۇعان دەيىن ۆيسە-پرەمەر، ۇلتتىق ەكونوميكا ءمينيسترى سەرىك جۇمانعارين حابارلاعان بولاتىن. 2025 جىلدىڭ قورىتىندىسى بويىنشا قازاقستاندىقتاردىڭ ناقتى تابىسى ينفلياسيانى ەسكەرە وتىرىپ، نومينالدى ءوسىم 10،2% بولعان كەزدە 1،1%-عا تومەندەدى. جان باسىنا شاققانداعى ورتاشا تابىس 238 070 تەڭگەنى قۇرادى. جالاقىنىڭ جىو-دەگى ۇلەسى شامامەن 31%-دى قۇرايدى (2024 جىلدىڭ قورىتىندىسى بويىنشا)، ال دامىعان ەلدەردە بۇل كورسەتكىش 40%-دان اسادى. وسىعان بايلانىستى ۇلتتىق ەكونوميكا مينيسترلىگى تابىستى ءبولۋدى ادىلەتتى ەتۋ مىندەتىن قويعان بولاتىن، ياعني بيزنەس پايدانى تەك ديۆيدەندتەرگە ەمەس، ەڭبەك اقىعا كوبىرەك جۇمساۋى ءتيىس.