فرانسيادا بريجيت ماكرون ەركەك بولىپ تۋعان دەپ تۇجىرىمداعان جۋرناليست ءارى بلوگەر ناتاشا رەي قايتىس بولدى. رەيدىڭ قايتىس بولعانى تۋرالى فرانسۋز ءجۋرناليسى كساۆە پۋسسار الەۋمەتتىك جەلىدەگى X پاراقشاسىندا حابارلادى، دەپ جازادى infohub.kz سايتى.
«ناتاشا رەيدىڭ 13 قىركۇيەكتە سەنت قالاسىندا (شارانت-ماريتايم) قاتەرلى ىسىكتەن قايتىس بولعانىن تەرەڭ قايعىمەن بىلدىك. بريجيت ماكرون ءىسىنىڭ باستاۋىندا تۇرعان ناتاشا رەي سەن-پالە زيراتىنا جەرلەنەدى»، — دەپ جازدى كساۆە پۋسسار.
فرانسۋز تىلىندەگى جازباسىندا جۋرناليست ناتاشا رەيدىڭ سەن-پالە شىركەۋىندە ساعات 14:30-دا وتكەن مەسسادان كەيىن سەنت قالاسىنداعى سەن-پالە زيراتىنا جەرلەنەتىنىن ناقتىلادى.
ريا ءنوۆوستيدىڭ مالىمەتىنشە، 13 قىركۇيەكتە فرانسۋز ءجۋرناليسى ءارى بلوگەر ناتاشا رەي پاريج اپەللياسيالىق سوتىندا فرانسيا پرەزيدەنتىنىڭ جۇبايى بريجيت ماكرونعا قارسى جالا جابۋ ءىسى بويىنشا جەڭىسكە جەتتى. بۇل تۋرالى ءجۋرناليستىڭ ادۆوكاتى فرانسۋا دانگلەان مالىمدەدى.
«ناتاشا رەي بريجيت ترونە-ماكرون مەن جان-ميشەل ترونەنىڭ توبى تاراپىنان قوزعالعان جالا جابۋ پروسەسىندە تۇپكىلىكتى جەڭىسكە جەتتى»، — دەدى ادۆوكات.
ەسكە سالايىق، 2024 جىلدىڭ كۇزىندە پاريجدە ماكروننىڭ جۇبايى ەركەك بولىپ تۋعان دەپ مالىمدەگەن ايەلدەرگە ۇكىم شىعارىلعان بولاتىن. وندا ولار 500 ەۋرو كولەمىندە شارتتى ايىپپۇلعا تارتىلعانى حابارلانعان. سونىمەن قاتار ولار ءبريجيتتىڭ وزىنە 8 مىڭ ەۋرو، ال اعاسى جان-ميشەل ترونەگە 5 مىڭ ەۋرو وتەماقى تولەۋگە مىندەتتەلدى.
2025 جىلدىڭ شىلدەسىندە پاريج سوتى ناتاشا رەيدى اقتادى.
24SMI سايتىنىڭ مالىمەتىنشە، بريجيت ماري-كلود ترونە 1953 جىلدىڭ 13 ساۋىرىندە فرانسيانىڭ سولتۇستىگىندەگى كوركەم پيكارديا ايماعىندا دۇنيەگە كەلگەن. ءبريجيتتىڭ اكەسى جان ترونە — كونديتەرلىك دۇكەندەر جەلىسىنىڭ يەسى، اناسى سيمونا پۋيول — ءۇي شارۋاسىنداعى ايەل. بولاشاق ءبىرىنشى حانىمنىڭ بالالىق شاعى امەن قالاسىندا ءوتتى. ترونە وتباسىندا التى بالا بولعان.