Bloomberg اگەنتتىگى ناتو-نىڭ جوعارى اسكەري قولباسشىلىعى رەسەي اليانستىڭ شىعىس قاناتىنا شابۋىل جاساعان جاعدايدا جىلدام جەڭىسكە جەتۋدىڭ ستراتەگياسىن ازىرلەپ جاتقانىن حابارلادى. جوسپاردا دروندار مەن جاساندى ينتەللەكتىنى بىرىكتىرۋگە ەرەكشە كوڭىل بولىنگەن، دەپ جازادى infohub.kz سايتى.
باسىلىمنىڭ مالىمەتىنشە، «جەڭىس تەورياسى» دەپ اتالعان قۇجات ناتو اۋماعىنا ىقتيمال باسىپ كىرۋ كەزىندە اليانستىڭ قانداي ارەكەتتەر جاسايتىنىن ايقىنداۋعا ءتيىس. ونى پولشادا ناتو-نىڭ ەۋروپاداعى بىرىككەن قارۋلى كۇشتەرىنىڭ جوعارعى باس قولباسشىسى گەنەرال الەكسۋس گرينكەۆيچ تانىستىرماق.
احۋالدان حاباردار جوعارى لاۋازىمدى شەنەۋنىكتەر مەن ديپلوماتتاردىڭ ايتۋىنشا، بۇل قۇجات اليانستىڭ ناتو اۋماعىنا ىقتيمال باسىپ كىرۋگە قالاي جاۋاپ بەرەتىنىن ناقتىلاۋى كەرەك. «سوڭعى ۋاقىتتا ماسكەۋدىڭ وسىنداي ارەكەتتەردى قاراستىرىپ جاتقانى تۋرالى كوپتەگەن حابارلامالار شىقتى. ناتو باس حاتشىسى مارك ريۋتتە جاقىندا رەسەيدىڭ اليانسقا كونۆەنسيالىق شابۋىلعا دايىندالىپ جاتقانى تۋرالى ەشقانداي بەلگى جوق ەكەنىن، الايدا ەۋروپا ۇزاققا سوزىلاتىن گيبريدتىك شابۋىلدارعا دايىن بولۋى كەرەكتىگىن مالىمدەدى»، — دەپ جازادى باسىلىم.
قولباسشىلىق وكىلى پولكوۆنيك مارتين و’دوننەلل جوسپاردىڭ ەگجەي-تەگجەيىن تالقىلاۋدان باس تارتتى، ءبىراق اليانستىڭ «تەك قورعانىس سيپاتىندا» ەكەنىن اتاپ ءوتتى. «ناتو-نىڭ ەۋروپاداعى بىرىككەن قارۋلى كۇشتەرىنىڭ جوعارعى باس قولباسشىسىنىڭ جەڭىس تۇجىرىمداماسى قاراپايىم: ناتو-نىڭ باسىمدىلىعىن ساقتاۋ. جاھاندىق قاۋىپسىزدىك سالاسىنداعى تۇراقسىز ءارى كۇردەلى احۋالدى ەسكەرسەك، ءبىز اگرەسسيانى تەجەۋگە جاعداي جاساپ، شابۋىل بولعان جاعدايدا جەڭىسكە جەتۋىمىز كەرەك»، — دەدى و’دوننەلل.
قۇجات سونداي-اق وداقتاستارعا ناتو-نىڭ ءداستۇرلى قارۋ تۇرلەرىن رەسەيدىڭ 2022 جىلى ۋكرايناعا تولىققاندى باسىپ كىرۋىنەن كەيىن پايدا بولعان جاڭا مۇمكىندىكتەرمەن قالاي ۇشتاستىراتىنىن كورسەتۋگە، سونداي-اق ولاردى قورعانىسقا ينۆەستيسيانى ۇلعايتۋعا جانە دايىندىق دەڭگەيىن ارتتىرۋعا ىنتالاندىرۋعا ءتيىس، دەدى جابىق اقپارات بولعاندىقتان اتىن جاسىرعان دەرەككوزدەر.
«ناتو-عا شابۋىل جاسالعان جاعدايدا اليانس قۇرلىق اسكەرلەرى مەن باسقا دا كۇشتەر مەن قۇرالداردى ۇشتاستىرا وتىرىپ، ارزان دروندارعا، ەكيپاجى از جۇيەلەرگە جانە جاساندى ينتەللەكت قولدانىلاتىن نىسانانى باعىتتاۋ تەحنولوگيالارىنا سۇيەنەتىن تۇجىرىمداما اياسىندا باسىپ كىرۋدى توقتاتۋدى كوزدەيدى. مانەۆر بوستاندىعىن قامتاماسىز ەتە وتىرىپ، اليانس قارسىلاستىڭ باسقارۋ جۇيەسىن جويۋعا ۇمتىلىپ، رەسەيلىك اسكەرلەرگە جىلدام ءارى كۇيرەتە سوققى بەرمەك»، — دەلىنگەن ماتەريالدا.