باتىس قازاقستان وبلىسىندا سوت ءتيىستى مەديسينالىق كومەك كورسەتىلمەۋى سالدارىنان ناۋقاستىڭ قايتىس بولۋىنا بايلانىستى مورالدىق زياندى وتەۋ تۋرالى تالاپتى قاناعاتتاندىردى. بۇل تۋرالى infohub.kz سايتى حابارلايدى.
باتىس قازاقستان وبلىستىق سوتىنىڭ ءباسپاسوز قىزمەتىنىڭ حابارلاۋىنشا، ەكى تالاپكەر بايتەرەك اۋدانىنىڭ №2 اۋرۋحاناسىنا تالاپ قويعان. ولار ءارقايسىسىنا 10 ملن تەڭگەدەن مورالدىق زياندى وتەۋ رەتىندە تولەۋدى تالاپ ەتكەن. تالاپتارىن ولار 2023 جىلعى جەلتوقساننان 2024 جىلعى 15 تامىزعا دەيىن ناۋقاس جالپى پراكتيكا دارىگەرىندە ەمدەلگەنىمەن، ونىڭ ساپاسىز مەديسينالىق كومەك كورسەتكەنىمەن نەگىزدەگەن. بۇزۋشىلىقتار تەكسەرۋ ماتەريالدارىمەن راستالعان. دارىگەر زەرتحانالىق زەرتتەۋ ناتيجەلەرىن تيىسىنشە ينتەرپرەتاسيالاعانىمەن، ناۋقاستى بەيىندى ماماندارعا (گاستروەنتەرولوگ، ينفەكسيونيست، گەپاتولوگ، حيرۋرگ، تراۆماتولوگ) جانە پاتوگيستولوگيالىق قورىتىندى العاننان كەيىن ونكولوگقا ۋاقتىلى جولداماعان. كۇيەۋى مەن اكەسىنىڭ قايتىس بولۋى تالاپكەرلەر ءۇشىن مورالدىق، فيزيكالىق جانە رۋحاني ازاپپەن بايلانىستى وتە اۋىر پسيحولوگيالىق سوققى بولدى.
سوت وتىرىسىندا تالاپكەرلەردىڭ وكىلى تالاپتى تولىق كولەمدە قولدادى. جاۋاپكەردىڭ وكىلى تالاپتى مويىنداماي، مەديسينالىق قىزمەتتەر تولىق كولەمدە كورسەتىلگەنى، ساراپتامالار سەبەپ-سالدارلىق بايلانىستى راستاماعانىن ءتۇسىندىردى. ول اۋرۋدىڭ جاسىرىن سيپاتى جانە قولايسىز بولجامى بولعانىن ايتىپ، تالاپتى قاناعاتتاندىرماۋدى سۇرادى. ءۇشىنشى تۇلعا دا تالاپپەن كەلىسپەدى، ناۋقاس قارا ءناجىس پەن قۇسۋعا شاعىمدانعانىن، وعان فگدس ءوتۋ جانە تالداۋ تاپسىرۋ ۇسىنىلعانىن ءتۇسىندىردى. جاعدايى ناشارلاعاندا ۇيدە پاتروناج ۇيىمداستىرىلدى. دياگنوز ۋاقتىلى قويىلمادى، ءبىراق جقا ناتيجەسى سىني بولمادى. ءۇشىنشى تۇلعا: «ءوز تاراپىمىزدان قولىمىزدان كەلگەننىڭ ءبارىن جاسادىق» دەپ مالىمدەدى.
سوت جالپى پراكتيكا دارىگەرىنىڭ مەديسينالىق كومەك كورسەتۋدە اقاۋلار جىبەرگەنىن انىقتادى. قىزمەتتىك مىندەتتەرگە ادال ەمەس قاراۋ، ستاندارتتاردى بۇزۋ، دارىگەرلەردىڭ زەرتحانالىق تالداۋلارداعى وزگەرىستەرگە جانە ناۋقاستىڭ شاعىمدارىنا دەر كەزىندە جاۋاپ بەرە الماۋى سياقتى بىلىكتىلىكسىز ارەكەتتەرى ونكولوگيالىق اۋرۋدىڭ ۋاقتىلى انىقتالماۋىنا جانە ناۋقاستىڭ كەنەتتەن قايتىس بولۋىنا اكەلدى. ق ر ازاماتتىق كودەكسىنىڭ 921-بابىنا سايكەس، مەديسينا قىزمەتكەرلەرىنىڭ بۇزۋشىلىقتارى ءۇشىن جاۋاپكەرشىلىك مەديسينالىق مەكەمەگە جۇكتەلەدى.
بايتەرەك اۋدانىنىڭ №2 اۋرۋحاناسىنا قاتىستى تالاپ ءىشىنارا قاناعاتتاندىرىلدى. سوت تالاپكەرلەردىڭ جاقىن ادامىنان ايىرىلۋ سالدارىنان تەرەڭ قايعى مەن كۇيزەلىس كەشكەنىن ەسكەرىپ، ءارقايسىسىنا 700 مىڭ تەڭگەدەن ءوندىردى. شەشىم زاڭدى كۇشىنە ەنگەن جوق.