قازاقستاننىڭ تۇڭعىش پرەزيدەنتى نۇرسۇلتان نازاربايەۆ كاسپي تەڭىزىندەگى وقۋ-جاتتىعۋ كەزىندە قازاقستاندىق اسكەري قىزمەتشىلەردىڭ قازا تابۋىنا بايلانىستى كوڭىل ايتتى. بۇل تۋرالى ەكس-پرەزيدەنتتىڭ رەسمي سايتىندا جازىلعان، دەپ حابارلايدى infohub.kz سايتى.
كوڭىل ايتۋ حابارلاماسىندا نازاربايەۆ ماڭعىستاۋ وبلىسىنداعى اسكەري وقۋ-جاتتىعۋ بارىسىندا قارۋلى كۇشتەر اسكەري قىزمەتشىلەرىنىڭ قازا تاپقانى تۋرالى قايعىلى حاباردى تەرەڭ قايعىرا قابىلداعانى اتاپ وتىلگەن.
«ورنى تولماس قازانىڭ اششىسىن بولىسە وتىرىپ، تۇڭعىش پرەزيدەنت قازا تاپقانداردىڭ تۋعان-تۋىستارى مەن جاقىندارىنا شىن جۇرەكتەن كوڭىل ايتتى»، — دەلىنگەن حابارلامادا.
24 قىركۇيەك كۇنى تۇستەن كەيىن اسكەري-تەڭىز كۇشتەرى كاسپي تەڭىزىنىڭ جاعالاۋىندا وقۋ-جاۋىنگەرلىك مىندەتتى ورىنداپ جاتتى. اۋا رايى كۇرت ناشارلاپ، جەل كۇشەيدى، ناتيجەسىندە 17 اسكەري قىزمەتشى اشىق تەڭىزگە اعىزىلىپ كەتتى.
قورعانىس مينيسترلىگىنىڭ دەرەگىنشە، 12 ادام قازا تاپتى. ۇشەۋىن قۇتقارىپ قالۋ مۇمكىن بولدى، ولاردىڭ بىرەۋى اۋرۋحاناعا ءتۇستى. تاعى ەكى ساربازدى ىزدەۋ جالعاسۋدا.
قايعىلى وقيعانىڭ سەبەپتەرىن تەرگەۋ جونىندەگى ۇكىمەتتىك كوميسسيانى قانات بوزىمبايەۆ باسقاردى. اسكەريلەردىڭ قازا تابۋىنا قاتىستى قىلمىستىق ءىس قوزعالدى. باس پروكۋراتۋرا تەرگەۋدى ەرەكشە باقىلاۋعا الدى.
كەيىن پرەزيدەنت قاسىم-جومارت توقايەۆ 25 قىركۇيەكتى قازا تاپقان اسكەري قىزمەتشىلەردى ەسكە الۋ كۇنى دەپ جاريالادى.
بۇعان دەيىن «كۋرسيۆ» ساربازداردىڭ قازا تابۋىنا قاتىستى قازاقستان رەسپۋبليكاسى قىلمىستىق كودەكسىنىڭ 453-بابىنىڭ 2-بولىگى («قىزمەتكە نەمقۇرايلى قاراۋ، اۋىر زارداپتارعا اكەپ سوققان») جانە 465-بابى («كەمە جۇرگىزۋ ەرەجەلەرىن بۇزۋ») بويىنشا قىلمىستىق ءىس قوزعالعانىن جازعان.