Nazarbayev University Times Higher Education (THE) World University Rankings رەيتينگىندە ەكىنشى جىل قاتارىنان ءوز ورنىن جاقسارتىپ، بىردەن 100 ساتىعا كوتەرىلدى، ال ەكى جىلدا 200 پوزيسياعا ءوستى، دەپ حابارلايدى infohub.kz سايتى.
2024 جىلى ۋنيۆەرسيتەت 501–600 دياپازونىندا بولسا، كەلەسى رەيتينگتىك سيكلدە 401–500-گە كوتەرىلدى، ال اعىمداعى رەيتينگتە 376–400 توبىنا ەندى. سونىمەن قاتار، NU قازاقستان مەن ورتالىق ازيانىڭ جوو اراسىندا ءبىرىنشى ورىندى ساقتاپ قالدى.
THE World University Rankings الەمدەگى ەڭ بەدەلدى ۋنيۆەرسيتەت رەيتينگتەرىنىڭ ءبىرى سانالادى. بيىل وعان 118 ەل مەن ايماقتان رەكوردتىق 2 297 ۋنيۆەرسيتەت ەندى — بىلتىرعىدان 106-عا ارتىق. حالىقارالىق باسەكە كۇشەيىپ جاتقاندا NU ەكى جىلدا الەمنىڭ توپ-23%-نان توپ-17% ۋنيۆەرسيتەتتەرىنىڭ قاتارىنا كوتەرىلدى.
THE ۋنيۆەرسيتەتتەردى بەس باعىت بويىنشا باعالايدى: ءبىلىم ساپاسى، زەرتتەۋ ورتاسى، زەرتتەۋ ساپاسى، حالىقارالىق اشىقتىق جانە يندۋستريامەن ءوزارا ارەكەتتەستىك. جاڭا رەيتينگتە NU بارلىق دەرلىك باعىتتار بويىنشا ناتيجەسىن جاقسارتتى. ەڭ كۇشتى كورسەتكىش — زەرتتەۋ ساپاسى. بۇل تۇرعىدا NU-دىڭ ناتيجەسى University of Geneva، University of Arizona جانە University of Rochester-پەن سالىستىرۋعا تۇرارلىق، بۇل ۋنيۆەرسيتەت زەرتتەۋلەرىنىڭ ىقپالى ارتىپ كەلە جاتقانىن كورسەتەدى.
«ەڭ الدىمەن NU قاۋىمداستىعىن جانە قازاقستاندى وسى ناتيجەمەن قۇتتىقتاعىم كەلەدى. تۇڭعىش رەت قازاقستاندىق ۋنيۆەرسيتەت الەمنىڭ جەتەكشى ۋنيۆەرسيتەت رەيتينگتەرىنىڭ بىرىندە وسىنداي دەڭگەيگە جەتتى. بۇل — تەك ءبىزدىڭ ۋنيۆەرسيتەت ءۇشىن عانا ەمەس، ەلدىڭ جوعارى ءبىلىم جۇيەسى ءۇشىن دە ماڭىزدى جەتىستىك. بۇل ناتيجەنىڭ ارتىندا NU وقىتۋشىلارىنىڭ، زەرتتەۋشىلەرىنىڭ، ستۋدەنتتەرى مەن قىزمەتكەرلەرىنىڭ كوپجىلدىق ەڭبەگى تۇر. ۋنيۆەرسيتەتتىڭ، عىلىم مەن ءبىلىمنىڭ دامۋىنا ءوز ەڭبەگىمەن ۇلەس قوسىپ جۇرگەن اركىمگە العىس ايتامىن»، — دەدى NU پرەزيدەنتى ۆاكار احماد.
NU-دا وقۋعا دەگەن قىزىعۋشىلىق تا ارتىپ كەلەدى. بيىل وقۋعا شامامەن 12 مىڭ ادام تاپسىردى، ال شەتەلدىك ستۋدەنتتەردى قابىلداۋ ۋنيۆەرسيتەت تاريحىنداعى ەڭ جوعارى كورسەتكىشكە جەتتى. تۇلەكتەردىڭ جۇمىسقا ورنالاسۋ دەڭگەيى جوعارى — 95%-دان استام.
بۇل ناتيجەلەر NU-دىڭ اكادەميالىق بەدەلىنىڭ نىعايىپ، قازاقستاندا جانە ودان تىس جەرلەردە ۋنيۆەرسيتەتكە دەگەن سەنىمنىڭ ارتقانىن كورسەتەدى. حالىقارالىق رەيتينگتەردەگى ءوسىم ۋنيۆەرسيتەتتىڭ تۇراقتى دامۋىن جانە جاھاندىق اكادەميالىق قاۋىمداستىقتاعى ءرولىنىڭ ارتىپ كەلە جاتقانىن راستايدى.
اعىمداعى رەيتينگتە قازاقستان ون ۋنيۆەرسيتەتپەن ۇسىنىلعان. ولاردىڭ قاتارىندا س.ج. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتى (1201–1400)، ءال-فارابي اتىنداعى قازاق ۇلتتىق ۋنيۆەرسيتەتى (1401–1600)، ق.ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى (1401–1600)، ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى (1601–1800) بار.