نەمىس جۇبى AIDA Cruises كرۋيزدىك كومپانياسىن دۇنيەجۇزىلىك ساياحاتتان كەيىن سوتقا بەرىپ، لاينەردەگى نۋديستەر ايماعى برونداۋ كەزىندە كورسەتىلگەننەن ايتارلىقتاي كىشىرەيگەنىن العا تارتتى. تۋريستەر وتەماقى تالاپ ەتىپ، سوت ولاردىڭ تالابىن ءىشىنارا قاناعاتتاندىردى، دەپ حابارلايدى infohub.kz.
Bild مالىمەتىنشە، دورتمۋندتان كەلگەن سابينا حارتمانن مەن ميحاەل ب. 2024 جىلدىڭ اقپانىندا AIDAdiva لاينەرىندە 128 كۇندىك دۇنيەجۇزىلىك كرۋيزگە تاپسىرىس بەرگەن. ساپار ولارعا شامامەن 70 مىڭ ەۋروعا (شامامەن 37،53 ملن تەڭگە) تۇسكەن.
جۇپ كەمەنىڭ جوسپارىن الدىن الا زەرتتەگەن. سول كەزدە 14-پالۋبادا ۇلكەن FKK ايماعى بولعان. FKK — گەرمانيادا كيىمسىز دەمالىس مادەنيەتى تانىمال. نۋديستەرگە ارنالعان ارنايى ايماقتار جاعاجايلاردا، ساياباقتاردا، قوناقۇيلەردە، ءتىپتى كرۋيزدىك لاينەرلەردە دە بار.
الايدا كرۋيز باستالعانعا دەيىن AIDAdiva اۋقىمدى رەكونسترۋكسيادان وتكەن. بۇرىنعى FKK ايماعىنىڭ ورنىنا 14-پالۋبادا ليۋكس جولاۋشىلارعا ارنالعان جاڭا Sky Deck الاڭى پايدا بولعان.
قالعان جولاۋشىلار ءۇشىن لاينەردە شاعىن نۋديستەر ايماعى قالدىرىلعان. جۇپتىڭ ايتۋىنشا، ول بۇرىنعىدان الدەقايدا كىشى بولعان، سونداي-اق دۋش پەن دجاكۋزي سياقتى كەيبىر ىڭعايلىلىقتاردان ايىرىلعان.
جۇپ دەمالىس جاعدايلارى ايتارلىقتاي وزگەرگەنىن ەسەپتەپ، 15 مىڭ ەۋرونى (شامامەن 8،1 ملن تەڭگە) قايتارۋدى تالاپ ەتكەن. ولار سونداي-اق كومپانيادان بارلىق جولاۋشىلارعا جاڭا جوعارعى پالۋبانى پايدالانۋعا رۇقسات بەرۋدى سۇراعان، ءبىراق باس تارتىلعان.
ءىس سوتقا جەتكەن. روستوك جەر سوتى تۋريستەردىڭ كۇتۋلەرى شىنىمەن بۇزىلعانىمەن كەلىسكەن. الايدا سوت وتەماقى 15 مىڭ ەمەس، ساپار قۇنىنىڭ 5% بولۋى كەرەك دەپ شەشكەن. شەشىم ازىرگە زاڭدى كۇشىنە ەنبەگەن.
كرۋيزدىڭ ءوزى جوسپارلانعان باعىت بويىنشا وتكەن. AIDAdiva 2025 جىلدىڭ 10 قاراشاسىندا گامبۋرگتەن جولعا شىعىپ، 128 كۇن ىشىندە 28 ەل مەن 53 پورتقا بارعان.
كرۋيزدىك لاينەرلەر بۇرىننان ءبىر قالادان ەكىنشى قالاعا جەتۋدىڭ قۇرالى عانا ەمەس. كەيبىر كەمەلەردە ونداعان مەيرامحانالار، باسسەيندەر، اكۆاپاركتەر، تەاترلار، كلۋبتار، سپا جانە جەكە دەمالىس ايماقتارى بار. تاقىرىپتىق كرۋيزدەر دە بار، ال كەيبىر كومپانيالار نۋديستەرگە ارنالعان ارنايى لاينەرلەر مەن ساياحاتتاردى ۇسىنادى.
بۇعان دەيىن Kursiv LifeStyle قىتايدا Adora Magic City توعىز پالۋبالى لاينەرىندە شانحايدان دەمالىس كۇندەرى كرۋيزدەر جاسالا باستاعانىن جازعان. كلاسسيكالىق تەڭىز تۋرلارىنان ايىرماشىلىعى، بۇل باعىت شەتەل پورتتارىنا كىرۋدى قاراستىرمايدى.